انا قدوة لأصحابي

حدوتة :

بقلم: شيماء أبوزيد

كان ياما كان ياسادة ياكرام ولا يحلى الكلام الا بذكر النبي عليه الصلاة والسلام....
كان في زمان ولد جميل ومؤدب رجع من المدرسة زعلان ومضايق جداً،
بيقول لماما :ياماما حضرتك دايماً بتقوليلي إتكلم كويس، واسمع كلام اللي اكبر منك، ومتغلطش في حد، وانا لما باعمل كده كل أصحابي بيضحكوا عليا وبيضايقوني، انا تعبت ومش عارف أنا اللي صح ولا هما!!!!!
إستغربت ماما جداً من كلام الولد، وقالتله:ازاي ياحبيبي! يعني المحترم وصاحب الأخلاق الكويسة الناس تضحك عليه؟!
رد الولد وقال:ياماما انا مش بحب اضايق حد من أصحابي زي ماعلمتيني ولا باقول كلام مش صح انه يتقال، لكن فعلا انا اكتر حد صحابي بيضايقوني وهما محدش بيضايقهم، وكمان انا اصلا باشوف في التلفزيون ناس بتكون مش كويسة وبتكون ناجحة جدا وناس كتير بتحبها مع انها بتعمل حاجات كتير غلط وكل الناس عارفة وبالرغم من كده بيحبوهم وبيتفرجوا عليهم ومحدش بيضايقهم يبقى مين اللي صح انا ولا هما؟!!!!
ردت ماما وقالت:طيب شوف ياحبيبي احنا ربنا سبحانه وتعالى خلقنا وخلقلنا عقل ميزنا بيه عن باقي المخلوقات، صح؟
رد الولد وقال:ايوه ياماما.
وكملت ماما كلامها وقالت:وخلقلنا كمان جنة ونار، يعني احنا بعقولنا نقدر نميز الصح من الغلط أو الحلال من الحرام...
تعالى انا وانت نتفق على طريقة ايه رأيك تحاول تتكلم مع أصحابك بطريقة جميلة يحبوها وتخليهم يحبوك من أفعالك مش بالكلام أو الصوت العالي...
وتكون انت قدوتهم في كل حاجة حلوة يعني تقابل الإساءة بالإحسان كمان لأن ربنا سبحانه وتعالى أمرنا بالكلمة الطيبة، يعني انصحهم بهدوء، وخليك قدوة صالحة، وخليك واثق ان طول ماانت بتسمع كلام ربنا بس يبقى انت صح خليك واثق من نفسك واستخدم نعمة العقل ومتخليش اي حاجة مش كويسة تأثر عليك...
الولد الجميل سمع كلام ماما واقتنع جدا وفعلا في كتير من أصحابه حبوه جدا وبيقلدوه وأصبح قدوة للخير والإحترام والتسامح وكل حاجة حلوة
وتوتة توتة خلصت الحدوتة واستنونا في حدوتة جديدة مفيدة
ومتنسوش احنا اللي بنقدر نكون صالحين أو لأ.
بلاش التقليد الأعمى الشائع حتى لو ناجح...
استخدم نعمة العقل والتميز
دمتم قدوة صالحة