اسمع الكلام

يوميات مهندس مشاكس

بقلم: تامر راغب

" من مذكراتي مع مديري رحمه الله عليه "

الحوارات كانت لاتنتهي مع مديري
يديني شغلانه اقعد اسأل ليه وعلشان ايه
يفتح موضوع اقعد اتناقش معاه
ماهو انا لازم افهم واقتنع .

وفي الاخر يتنرفز
ويقولي انا مديرك وحتنفذ غصب عنك .

والحوارات والجدالات دي احيانا كانت تمتد لما يقرب من النصف ساعه واحيانا الساعه
وضغط مديري كان بيعلي ووشه بيحمر بطريقه بشعه .

المهم في يوم وانا بتكلم مع كبير فنيي الصيانه " الحاج سيد " ، نصحني نصيحه وقالي :

الحاج سيد : بلاش المجادلات والحوارات دي اللي بتدخلها مع المدير
لانها حتأثر علي تقييمك اخر السنه لانك بتنرفزه وبتخرجه عن شعوره .

انا : تصدق عندك حق
طيب تنصحني بايه ؟

الحاج سيد : لما يكلمك في حاجه قوله حاضر
لما يطلب منك حاجه قوله حاضر
لما يفتح معاك اي موضوع قوله حاضر واسكت .

انا : بس انا كده ممكن يحصلي حاجه
ينفع انهي الموضوع معاه كده من غير نقاش
ومين غير ما افهم واقتنع

الحاج سيد : ياعم اسمع الكلام وحتدعيلي .

انا : ماشي ححاول .

المهم دخلت انا والحاج سيد لمديري
وطلب مني حاجه
قولتله حاضر
لقيته بيبصلي كده مستغربني
طلب مني حاجه تانيه
قولتله حاضر
لقيت علامات الاستفهام والتعجب والاستغراب علي وجه مديري
بس في الاخر قالي اتفضل نفذ .

اول ماطلعت انا والحاج سيد من مكتب مديري اتفتحنا في ضحك بصوت عالي

مديري سمع صوت ضحكنا

فدار الحوار التالي :

مديري : انت وهو
تعالولي حالا .

انا : حاضر تحت امرك .

مديري : موجها سؤاله للحاج سيد " انتم بتضحكوا علي ايه " ؟

الحاج سيد : مفيش حاجه حضرتك
اصل افتكرنا حاجه وضحكنا عليها .

مديري : موجها سؤاله لي " انتم بتضحكوا علي ايه " ؟

انا : اصل الحاج سيد قالي اي حاجه حضرتك تطلبها واي حاجه تقولها ، ارد عليك واقولك حاضر وخلاص علشان نخلص من الجدال والنقاش و انقذ نفسي من التقييم السنوي آخر السنه و.........

الحاج سيد : الله الله الله الله
ايه اللي بتقوله ده ياباشمهندس تامر

انا : ايه ياحاج يعني اكدب

مديري : انا برضو بقول كلمه حاضر دي منك مكنتشي مطمناني .

وانت ياحاج سيد
بقي كده
بتقوله ياخدني علي قد عقلي

الحاج سيد : وهو بيبصلي ونفسه يخنقني
مقصدش حضرتك
انا فعلا غلطان واستاهل اني نصحته .

طبعا انفجرت في الضحك ، والصراحه مديري قعد يضحك .

الغريبه ان الحاج سيد مضحكشي مش عارف ليه

أسعد الله اوقاتكم
ودمتم بخير