ذكريات شقاوه طفوله (1)

يوميات مهندس مشاكس

بقلم: تامر راغب

وانا صغير كنت باعمل عمايل سوده بعيد عن السامعين وكل عمله والتانيه مصيبه لوحدها

وامي ربنا يديها الصحه كانت بتاخد كل خضه والتانيه ربنا يعينها علي اللي كانت فيه .

تعالوا معايا نشوف ونسمع مع بعض اول كارثه انا فاكرها .
*******************************
السنه الدراسيه : الصف الخامس او السادس الابتدائي .
الدوله : الامارات العربيه المتحده
المكان : سوق رأس الخيمه .
الوقت : السابعه مساءا تقريبا

كنت مع والدتي في السوق لشراء بعض المستلزمات الخاصه بالمنزل

وكان بالصدفه موجود واحد اماراتي صاحب والدي شاءت اقداره السيئه ان يتواجد في نفس المكان والزمان .

إتْسّحَبْت من جنب والدتي في المحل اللي كنا فيه وخرجت لاجد صاحب والدي يقف بسيارته في السوق .

كان واقف بره عربيته مستني حد

المهم غفلت الراجل ورحت راكب عربيته

قعدت اتفرج عليها من جوه وبعدين شغلتها ونزلت الهاند بريك

وهووووووب

العربيه و لسوء الحظ كانت واقفه علي منزل طريق منحدر

ويادوب اول ما نزلت الهاند بريك انطلقت السياره كالصاروخ

والراجل صاحب العربيه اللي هو صاحب بابا لقيته طاير ورا العربيه وهو بيصرخ

والغطره والعقال اللي علي راسه طاروا وهو ماسك جلابيته بايده وبيجري ورا العربيه زي المجنون وبيصرخ " لحجوا علي " بالاماراتي يعني "الحقوني " بالمصري.

مكنتش عارف اوقف العربيه ازاي وكنت مخضوض جدا

المشكله ان آخر المنزل ده كان طريق رئيسي ولقيت عربيه تاكسي وقفت بتنزل زبون

العربيه اللي انا راكبها كده حتشيل العربيه اللي واقفه وحتحصل مصيبه كبيره

وبسرعه فتحت باب العربيه ورميت نفسي علي الاسفلت

وقعت علي ايدي واتدحرجت علي الاسفلت

وبعديها بثواني سمعت صوت ارتطام جامد جدا يصم الآذان

بصيت بطرف عيني لقيت العربيتين لبسوا في بعض لبسه ما يعلم بيها الا ربنا

ورجاله بتجري وستات بتصوت

وناس عماله تجري من هنا وهناك .

قمت من علي الارض وكانت ذراعي مجلوفه بقوه وكدمات وسحجات في كل حته في جسمي .

جريت بسرعه علي المحل اللي فيه والدتي

نفضت هدومي بسرعه واخذت نفس عميق علشان كنت بنهج ودخلت المحل

جريت ووقفت جمب والدتي كأن شيئا لم يحدث .

كانت اصوات سيارات الشرطه والاسعاف بالخارج عاليه جدا

وهرج ومرج في السوق والدنيا مقلوبه

وانا قلبي عمال يدق بقوه وانا في قمه الرعب والخوف ( طفل برضو ياجماعه ومخضوض )

وكل اللي مرعوب منه ياتري ايه حيحصلي لما ماما وبابا يعرفوا اللي عملته

وكنت خايف اسمع ان في حد مات بره .

المهم ماما خلصت شراء من المحل وقالتلي يلا بينا ياتامر

مسكت في ايدها بكل براءه الاطفال وطلعنا خارج المحل .

ووقفت والدتي مذهوله من شده الصدمه

ماما لقيت السوق كله مقلوب رأسا علي عقب

وشافت كردون امني حوالين الحادثه بتاعه العربيتين وشافت صاحب بابا وهو عمال يولول والشرطه ماسكاه

وستات عماله تعيط واطفال بترجف من الخوف ماسكين في امهاتهم

وأنا ثابت ثبوت الجبال .

والدتي سألت واحد من رجال الشرطه اللي واقفين :

امي : هو ايه اللي بيحصل ده .

الشرطي : ولد صغير " طال عمرك " ركب سياره وخلاها تتحرك من مكانها

والسياره صدمت تاكسي وبهدلت السواق واللي معاه .

امي : ربنا ياخده وفين اهله ده
بجد مفيش تربيه .

الشرطي : ينظر لي نظره غل قائلا لامي
هاذا هو الطفل طال عمرك .

امي تنظر لي وعينيها مفتوحتان عن آخرهما دون ان تنطق من شده الذهول

ياعيني معرفتشي تنطق من الصدمه ، ماهي مش عارفه ده حصل ازاي وانا معاها في المحل مسيبتهاش

وبجد اول مره اشوف ماما في الحاله دي

لا بتنطق ولا بتتكلم ومتسمره في مكانها وبتبصلي في ذهول .

الغريبه ان بابا لما سمع اللي حصل انتابته حاله ضحك هستيري

معرفشي لغايه يومنا ده هو ايه اللي حصله.....هو ده كان من الصدمه ولا اييييييييه .

بجد الاطفال احباب الله

خلي بالكم من ولادكم ياجماعه

أسعد الله أوقاتكم
دمتم بخير