أمانة عليك
بقلم - احمد خليفة:
مدرس لغة عربية بجدة
ياعمري استنى لما اوصل لآخر الخط
واكمل رحلتي وارسى هناك ع الشط
واشوف بكره قصاد عيني
سنين عايشة على جبيني
وحلم الحلم يتحقق
واقول العمر كان أصدق
من الأوهام واشد الخط
أمانة عليك
ترجع يوم من الماضي نهاره جميل
أعيشه بروح... وانا راضي يغيب في الليل
واقابل ناس كتير فاتو
واشوف اصحاب كتير ماتو
واعيش وياهم اللحظة
وأرجع تاني وف لحظة
أفوق م الوهم اشد الخط
أمانة عليك
تخليني أبطل خوف وابطل اشوف
ملامحي تضيع وماعرفهاش في وسط ألوف
وادور ع اللي راح والاقيه
بيرجع للي حاسس بيه
والاقي في الخريطة مكان
يحسسني ان انا إنسان
ساعتها خلاص حاشد الخط
