إشاره المرور

مذكرات مهندس مشاكس

بقلم: تامر راغب

كنت في اوائل ايامي في السودان لسه مش عارف الشوارع وكان معايا عربيه خاصه بالشغل بتحرك بيها

وفي احدي المرات وانا داخل علي اشاره مرور كان في اتوبيس علي يميني وبيتحرك بيعدي التقاطع علشان ياخد شمال وانا بتحرك معاه

اتاري الاشاره قفلت وانا مش واخد بالي وبعدي بالعربيه في حضن الاتوبيس

وهووب لقيت ضابط مرور في وشي وقفني

هو : ازاي تكسر الاشاره وتعدي يازول ؟

انا : انا عديت مع الاتوبيس اللي انت لسه سايبه يعدي حالا من جمبي .

هو : الرخص بتاعتك

انا : اتفضل اهي .

هو : اتفضل معايا علي القسم

انا : القسم !!!!!!!!

هو : طبعا القسم علشان يتم اتخاذ اللازم اثر هذه المخالفه الصريحه .

انا : طيب هو أنت مش ممكن تسحب الرخص او يبقي في غرامه ماليه ؟

هو : دي عقوبتها الحبس

انا : ياسيدي انا معرفش قوانين المرور عندكم ودي اول مره ارتكب مخالفه مروريه

هو : ده ماهو سبب مقنع علشان ترتكب المخالفه .

انا : طيب ماهو الاتوبيس ارتكب نفس المخالفه وانت خليته يعدي .

هو : اتفضل يا استاذ علي القسم

انا : طيب مش احنا اولاد النيل وانا ضيف عندكم ، هو ده كرم الضيافه يعني ؟

هو : انت مش ضيف انت صاحب بلد زي ما انت قولت وعلشان كده يطبق عليك القانون كأي واحد سوداني .

المهم بعد مباحثات وجدالات كتييييير قوي الراجل كتر الف خيره سابني امشي بعد مادفعت غرامه ماليه .

لما روحت الشغل بحكي لزمايلي السودانيين علي عقوبه الحبس دي لقيتهم مستغربين جدا

الراجل نشف دمي الصراحه لانه كان بيقولي الحبس وبعدين ترحيل علي مصر

تفتكروا كان بيسرح بيا
ولا حد موصيه عليا

دمتم بخير
أسعد الله اوقاتكم