إيه ب١٠٠ وش .. اللى ب١٠٠ مسلسل ده !

بقلم - هاله الدمراوى

دعونى فى البدايه أعترف لكم إننى لم أكن من المحسوبين علي جمهور النجمه نيللى كريم ولا المخرجه كامله أبو ذكرى ، وليس هذا -لسمح الله- عدم إعجاب أو تقدير لموهبتهما او لإبداعهما ، ولكن ربما لطبيعة أعمال بينهما ظلت لسنوات دسمة القتامه ، و ثقيلة الموضوعات ربما عليه أنا شخصيا ، لدرجه جعلتنى أبنى صوره فى ذهنى عن نيللي و كامله ؛ أكيد بقي الشخصيات ده صعبه فى الحقيقه ، قليلة الضحك ، بعيده عن صحبة الهاشين الباشين اللي أنا بقي ككاتبه ساخره قديمه واحده منهم !
قوم ييجى رمضان السنه ده بمسلسل كوميدى لنيللى كريم و كامله أبو ذكرى !
بتقولوا ايه يا ولاد كوميدى !
ايوه كوميدى !
بتقولوا ايه !
كوميدى !
و لمتطلبات المهنه تاره ، و لفضولي تارة أخرى ، شاهدت العمل ، من أول مشهد ، و الموضوع بالفعل خفيف و لذيذ و كوميدى من غير "هبل" ولا إستظراف ولا رخص ولا ألفاظ غريبه و حركات أغرب ...
إنتظرت حلقات حتى أتأكد من إحساسي ، فوجدته إحساس الأسره كلها كبيرها و صغيرها .
ب١٠٠وش عمل يعيد الي الشاشه كوميديا الموقف الحلوه ، و المشهد السريع ، والاحداث المتلاحقة بدون مط و تطويل ، و يعيد ضحكات الاسره العاليه المجلجله كلها مجتمعة أمامه ، و يعيد إكتشاف بطلته نيللي كريم كوجه ينفع يضحك و يقفى و يهزر و يروش بكل بساطه و يؤكد علي موهبتها الفنيه اللي إكتملت كده بجد ، كذلك يعيد معها إكتشاف المخرجه كامله أبو ذكرى مخرجة المسلسلات الدسمه التى تتطلب نوعيه معينه من المشاهدين ، و يزج بها فى منطقة الشمول و الحنكه التى ربما لم يصل إليها الا القليل جدا من المخرجين فى مصر .
لا ينتهى هذا الكلام دون تحيه طويله و تعظيم سلام للنجم صاحب الحضور الطاغى و الكاريزما الخاصه جدا أينما ظهر فى أى عمل من الأعمال ؛ آسر ياسين ، هذا نجم استثنائي بلا شك فى الأداء الجاد أو الكوميدى ، هناك مغناطيس يجذب الجميع إليه و الي طريقة آدائه السلسه البسيطه البعيدة عن أى تعقيدات او فذلكه أو تشنجات أو إفتعال .
كل التحيه بالطبع لمؤلفى العمل وأصحاب غزله و نسجه منذ الدقيقه الأولي ، ولكل نجوم العمل ، حتما سيكون لنا و لللإعلام كله معكم وقفات كثيره بعد إنتهاء حلقاته .
وفى النهايه لازم فرقة المدفعجيه كمان يعرفوا إنهم خللوا الناس كل يوم تستنى حتى أغنية "مليونير" ، مش علشان تسمعها ، لا ، علشان تقوم ترقص و تتنطط عليها !
مسلسل ب١٠٠وش ، ده ب١٠٠ مسلسل ،
حاله "كامله متكامله يا كامله" من الفن و البهجه ، جاءت فى وقت كنا فى أشد الإحتياج إليها ..
كل الشكر و التقدير للأستاذ الذى جمع الجمع و تحمس للتغيير و نفذ المغامره ، المنتج جمال العدل ، دينامو الدراما المصريه المشحون بالطاقه و المهنيه و الحب لهذه المهنه الرائعه .