صَدَقت الكورونا

شعر: ميادة الشربيني

حلم ولا علم ؟؟
حرب ولا سلم ؟؟
سؤال أخدنا جوله
وإحتاجنا وقفه ليه
كورونا مستجد
بس العقل بتلاغيه
جت زارتنا فجأه
كذبه بس صادقه
كل اللي بتقوله صح
واقع عيشنا فيه
قالت الحياه خدتنا
وصَدَقت الكورونا
توهنا فيها وفرقتنا
وقولنا كتير سيبونا
مش هنفضالكم شويه
صعب اعذرونا
لابن أو لأخ
أو لأمنا وأبونا
حِجة المستقبل
إللي لازم نبني فيه
كل إللى بتقوله صح
واقع عيشنا فيه
هدفنا جمع مال
شَغلنا قوت عيال
ف الهم الكل شال
وبعدنا عن دفا البيوت
وإشتياقنا ليه
كل اللي بتقوله صح
واقع عيشنا فيه
نسينا النضافه
وجت كورونا و فكرتنا
عقمت لنا العقول
قبل مانعقم ف بيتنا
هزه جامده فوقتنا وصحصحتنا
عرفتنا قيمة النعمه ف حياتنا
قيمة النسمه ف حارتنا
قيمة الجيره ومعنى
إحتياجنا ف يوم
ل جارنا أو جارتنا
ولو فى نية بعد عنهم
هى منهم حرمتنا
وقبل مانسيبهم سابونا
وصَدَقت الكورونا
كل إللي بتقوله صح
واقع عيشنا فيه
بينت مين فينا واعي
ومين بيعمل نفسه داعي
ومين بجد لعيلته راعي
وكله منه ليه
عششت ف قلوبنا خوف
لخبطتنا م الكسوف
الإيمان كان ضعيف ؟؟
ولا شماعة الظروف؟؟
بس شوف
الكورونا كذبه ؟؟
يمكن إحتمال
بس بردو صادقه
واقعنا إللي قال
غيرتنا رجعتنا بدلتنا
كلنا من حال لحال
عرفتنا إن الحياه
مش بس مال
وإن حضن الدنيا بارد
الدفا ف حضن العيال
وإن صحتنا أحق
نبني فيها بمال حلال
وإن ربنا السند لو بعدنا
كل شئ يسندنا مال
هى دى بقا الحكايه
والإجابه ع السؤال
إعقلوها وإفهموها
والرساله إستوعبوها
دى حقيقه مش خيال
صَدَقت الكورونا.