انا عايز اطبخ
مذكرات مهندس مشاكس
من مذكراتي في السودان # ١٣بقلم: تامر راغب
انا لا اجيد الطبيخ ومعرفش اعمل حاجه في المطبخ غير شاي ونسكافيه
في ذلك الوقت الذي كنت فيه في السودان
اتصلت بمراتي مساءا ، وهي في القاهره ودار بيننا الحوار التالي :
انا : مساء الخير حبيبتي
مراتي : مساء النور....... خيييير
انا : كنت عايز اطبخ
مراتي : اييه ده
هو انت بتقول ايه
انا : بقولك عايز اطبخ
مراتي : تطبخ ازاي يعني ؟
انا : حكلمك من خلال اللابتوب وتكوني معايا خطوه بخطوه وانا بطبخ علشان تكوني شايفه الخطوات .
مراتي : هههههههه
وناوي تطبخ ايه ان شاء الله .
انا : عايز اعمل هامبرجر
مراتي : هامبرجر
هو انت مصمم تجبلي الضغط
انا : هو الهامبرجر بيجبلك ضغط ؟
مراتي : اخلص ياتامر
انا : طيب انا اشتريت هامبرجر
ثواني افتح اللابتوب علشان تتابعي معايا
و قوليلي بقي اعمل ايه
مراتي : هات طاسه وزجاجه زيت
انا : تمام وبعدين
مراتي : حط زيت في الطاسه
وبعدين حط الهامبرجر
انا : حطيت زيت وحطيت الهامبرجر
مراتي : استني شويه بقي
انا : اقلب الهامبرجر ؟
مراتي : يا ابني اصبر هو لحق
انا : اقلب الهامبرجر ؟
مراتي : لسسسسسه اصبر شويه
انا : طيب اقلب الهامبرجر ؟
مراتي : اسكت شويه ياتامر
ومتقلبش الهامبرجر الا لما اقولك .
انا : حاضر ، اقلب الهامبرجر بقي
مراتي : صمت
انا : ها ، اقلب الهامبرجر
مراتي : صمت
الهامبرجر ابتدي يشيط والدخان ملا المطبخ
ببص علي اللابتوب
لقيت الاتصال اصلا فصل
شلت الطاسه من علي النار
واتصلت بمراتي تاني
اول ما ظهرت صورتها علي اللابتوب شافت الدخان مالي المطبخ
مراتي : ايه ده ايه اللي حصل ؟
انا : مش انتي قولتيلي متقلبش الهامبرجر الا لما تقوليلي ، وانا مخدتش بالي ان الاتصال انقطع وقعدت مستنيكي تقوليلي اقلب الهامبرجر لغايه ما اتحرق والدنيا اتملت دخان .
مراتي :ارحمني بقي انا تعبت
انا : اووووف بقي انا اللي ارحمك
انتي اللي مش عارفه تشرحيلي اطبخ ازاي
مراتي : يااااااااااااارب .
" أنا صممت أشهدكم علي مراتي
ياجماعه مش انا مظلوم المره دي وعندي حق "
انصفوني بقي
أسعد الله أوقاتكم
ودمتم بخير
