ميدو يفتح النار على قدامى اللاعبين.. ويكشف أكاذيبهم

فتح احمد حسام ميدو المدير الفني السابق للزمالك النار على عدد من اللاعبين القدامى بسبب اكاذيبهم المستمرة خلال تواجدهم فى البرامج الرياضية .

وكتب ميدو على صفحته الرسمية بموقع التواصل الاجتماعى تويتر:" كمية لاعيبة كورة سابقين طلعوا كذبوا شوية كذب الفترة اللي فاتت في التليفزيون كأن الناس جالها الزهايمر أو يوتيوب وجوجل اتحذفوا!!"

وأضاف:"أرجو من السادة المقدمين لما يلاقوا حد بجح اوي وبيكذب عيني عينك انهم يحرجوه بكلامه القديم والفيديوهات!! مش عيب على فكرة العيب انك تبقى عارف انه كذاب والمشاهد عارف انه كذاب وتعدي الموضوع علشان الراجل جدع وجالك ضيف!! او فريق الإعداد مش عايز يحرجه!!".

وأوضح:"اللاعيبه قالت اي كلام وأنا بصحى اشوف وعادي مابفتحش بوقي لكن بصراحة انفجرت دلوقتي لما قريت ان احمد السيد قال ان الزمالك فاوضه مرتين وهو رفض".

وتابع:"اللاعيبه مابتفرقش ما بين ان وكيل عرض عليك وما بين ان النادي عرض عليك رسميا.. شغلة الوكيل انه يحاول ويحاول يمكن الموضوع يمشي ويبتدي يشبطك معاه لحد مايوديك المكان اللي هو عاوزه لو قدر!!".

وقال:"من حق اي حد يقول رأيه في اي حد لكن الكذب العلني ده خاصة مع التكنولوجيا الحديثة غباء اجتماعي كبير جدا..وتاني بقول ان عيب في حق اي مقدم يبقا عارف ان اللي مستضيفه ليكذب ومعاه دلائل انه كذاب ومايقولوش حاجه!! برضوا ده غباء لإنك بتفقد قيمتك الحقيقية كمحاور!!".

وأضاف:"على فكره انا بهزر في موضوع احمد السيد..احمد كان لاعيب كويس جدا ومجتهد ومخلص ودمه خفيف جدا من الذ اللاعيبه اللي لعبت معاها في حياتي..".