تكييف المطعم

مذكرات مهندس مشاكس

( من ذكرياتي في السودان # ١٢ )

بقلم: تامر راغب

دخلت مطعم من المطاعم المشهوره في السودان

انتقيت ترابيزه في موقع متميز وقعدت عليها .

الترابيزه كانت في مواجهه تليفزيون كبير وفوق التليفزيون جهاز تكييف من الحجم الكبير .

وكان بالصدفه هناك ماتش مذاع لاحد الانديه المصريه وقتها ، فقولت اتفرج وانا باكل .

انا طول عمري ما بحبش ان التكييف يكون مسلط عليا

علشان كده ناديت احد العاملين في المطعم .

وشكله كان من احدي الدول المجاورة للسودان لانه بيتكلم عربي بصعوبة .

انا : ممكن لو سمحت توطيلي التكييف او تعلي الريش شويه .

هو : إنت آيز ايييه ؟

انا : ارفع ريش التكييف شويه .

هو : ريش اييييه دي ؟

انا : ابتديت اشاور علي التكييف وقولتله بردان
ارفع الريش .

هو : سابني ومشي ومعملشي حاجه

وأنا قاعد سقعااااااان

ومش لاقي ترابيزه تانيه انقل عليها

والتكييف عالي مش طايل انا الريش بتاعته علشان ارفعها .

بعد مرور مايقرب من خمسه دقائق

ناديت عليه تاني

فجالي وهو ممتعض

انا : مش قولتلك ارفع ريش التكييف انا سقعااااااااان

وشاورتله علي التكييف .

هو : اوكيه تمام .

لقيته راح ناحيه التكييف اللي فوق التليفزيون
وراح معلي التليفزيون اللي بيذيع الماتش علي اعلي درجه .

وهو ماشي راح مشاورلي تمام كده .

طبعا الموقف كالاتي :
كل الناس اللي في المطعم افتكرت اني انا طلبت منه يعمل كده علشان اتفرج علي الماتش بما اني مصري والماتش المذاع لاحد الانديه المصريه

وابتدوا يبصولي بامتعاض واشمئزاز وانا قاعد في نص هدومي مش عارف اعمل ايه

وصوت التليفزيون رهيييييب علي اعلي صوت .

الناس تندهله علشان يوطي التليفزيون لانهم مش سامعين بعض

الاقيه بيشاور عليا

الله يخرب بيتك البعيد ، طبعا بيقولهم اني انا اللي طالب كده

ابتدت همهمات غاضبه تظهر في المطعم .

قولت انا يوم اهلي مش حيعدي علي خير النهارده

فقولت الحق نفسي وروحت مزعق باعلي صوتي في المطعم

المدييييييييير

هاتولي مدير المكان ده فورا .

طبعا الناس كلها سابت الاكل وابتدت تبص تشوف المعتهوه اللي هو انا بيعمل ايه .

المهم جالي راجل محترم لابس بدله وقالي :

المدير : تحت امر حضرتك في ايه ؟

انا : الشخص اللي هناك ده طلبت منه يرفع ريش التكييف لاني سقعان راح رافع صوت التليفزيون والناس ابتدت تشتكي

لقيته بيقولهم اني انا اللي طلبت كده

والناس ابتدت تزووم وحسيت اني حنضرب هنا

يرضيك كده ؟

المدير : بعتذر ليك جدا
ده لازم يتعاقب

انا : بص حضرتك
الراجل واقف هناك اهو بيبصلي ازاي وعمال يضحك !!!!!!!!

انا بس عايز اعرف هو بيعمل كده ليه معايا ؟

المدير : راح وطي التليفزيون بنفسه وقلل بروده التكييف

و الناس مش مبطله ضحك وهي بتبصلي مش فاهم لغايه دلوقتي هم كانوا بيضحكوا علي ليه

أسعد الله أوقاتكم
ودمتم بخير