يارب يرجع العادى

وحشنا اليوم اللي كان عادي
بقينا بنحلم امتى يرجع كل شيء يكون عادي
أتاري نزولنا وسط الناس وزحمتهم ده شيء عادي
أتاري صلاتنا يوم الجمعة بعد الخطبة شيء عادي
بقينا واحشنا أي زحام
بقينا واحشنا لما ننام
نشوف أحلامنا شيء عادي
واحشنا حاجات من العادي
نسلم بالإيدين على بعض
نشوف ماتشات كتير مع بعض
ونتمشى ونتعشى ف مكان واحد أكيد مع بعض
ويجمعنا اللي كان عادي
واحشنا المشهد العادي
وكشك الناصية في الشارع
أعدي عليه وانا راجع
لبيتي بعد شغل طويل
عيال الحارة صوتها جميل
وهما بيلعبو الكورة
وكل بيوتنا مستورة
يعدي اليوم كده عادي
أتاري العادي كان نعمة
أتاري حياتنا م النجمة
نعيم حسينا بفراقه
تهل علينا أشواقه
تعرفنا ان يومنا العادي عمره ف يوم ما كان عادي