زياره زوجتي واولادي
يوميات مهندس مشاكس
من ذكرياتي في السودان # ١٠بقلم: تامر راغب
بعد انتهاء العام الدراسي في مصر
حجزت لزوجتي واولادي علشان يجولي الخرطوم يقضوا معايا شهور الاجازه الصيفيه .
كان ميعاد وصول الطائره السادسه مساءا للخرطوم .
بعد انتهاء وقت العمل
قولت اروح السوبر ماركت اجيب بقي حاجات للبيت واغير هدومي واطلع بعديها المطار استقبلهم .
روحت بقي اشتريت حاجات كتيير قوي
واكياس كتير مكنتش عارف امسكها
وطلعت علي البيت ولسه بحط المفتاح في باب الشقه
راح المفتاح مكسور
يادي اليوم الاغبر المنيل ده
وقفت ابص علي المفتاح مش مصدق والله
واكياس الحاجه اللي اشتريتها كلها علي الارض
والساعة تقترب من الخامسه
امامي اقل من ساعه علشان الحق اروح ادور علي نجار يحل المشكله دي
وبعدين احط الحاجات اللي اشتريتها في الثلاجه علشان متبوظشي
وأغير هدومي واطلع علي المطار .
قعدت ادور علي نجار مش لاقي
ابتديت اتوتر وخصوصا ان الطياره وصلت بالفعل
ومراتي كلمتني قالتلي احنا وصلنا وحننزل من الطياره اهو .
طبعا مرضتش اقولها البلوي اللي انا فيها .
اخيرا لقيت نجار
قعد يحاول يحل المشكله مش عارف .
مراتي بتكلمني : تامر احنا قدام السير ، حناخد شنطنا ونطلع ، انت فيييييبين ؟
و بجد انا اتوترت مش عارف اعمل ايه ولا اقول لمراتي ايه
اسيب النجار واطلع علي المطار
ولا اخلي مراتي تستني في المطار لغايه ما ام الباب يتفتح
بجد المصائب لا تأتي فرادي
لقيت مراتي بتكلمني تاني وفي دوشه رهيبه جمبيها .
مراتي : تامر انت فيييييبين الحقنا
فيه خناقه كبيره هنا في صاله القدوم في المطار واحنا خايفيين قوي .
انا : اهدي بس
خناقه ايه ؟
مراتي : في فريق كوره اتخانق مع فريق كوره تاني وعمالين يضربوا في بعض والدنيا مقلووووبه ،
انت فيييييببييين ياتااااااااااامر؟
انا : حاضر والله جاي حالا
كلمت صديق عزيز عليا قولتله تعالالي فورا شقتي
وحكيتله الموقف المهبب اللي انا فيه
وقولتله تعال خليك مع النجار لغايه ما يفتح الباب او يكسره وانا حطلع علي المطار فورا .
وصلت المطار لقيت قوات الامن مانعين اي حد يدخل او يخرج لغايه ما يسيطروا علي الوضع .
مراتي : انت فين ؟
نفسي اعرف انت مختفي فين ؟
انا : اقسم بالله واقف بره المطار مش عارف ادخل
بعد مايقرب من الساعه سمحوا لي بالدخول
طبعا رايح اقابل مراتي بهدوم مبهدله وعرقان ووشي اصفر .
مراتي قعدت تبصلي بذهول وانا بسلم عليهم بفتور وذهني مشغول في باب الشقه اللي حيتكسر وحقول لصاحبه الشقه ايه
وحنبات ازاي في الشقه وبابها مكسور
المهم الحمد لله علي ما وصلت الشقه لقيت صاحبي بيقولي النجار قدر يحل المشكله وركبنا كالون بمفتاح جديد
الله يكرمه يارب .
مراتي : اول مانزلت من العربيه ولسه حنزل الشنط لقيتها بتقولي
انت ازاي بتقابلنا بفتور كده ؟
انا : ححكيلك اللي حصل .
مراتي : وازاي جاي تقابلنا بلبس مبهدل كده ؟
انا : ححكيلك اللي حصل
مراتي : وازاي تسيبنا ملطوعين في المطار كل الوقت ده ؟ .
انا : ممكن تركبي العربيه تاني بسرعه .
مراتي : ليه في ايه ؟
انا : حرجعك في الطياره اللي راجعه مصر دلوقتي حالا
انا مش ناقص وجع دماغ
عادي يعني لما الواحد يروح الشغل وفيه شويه كدمات او سحجات في جسمه
بتحصل يعني عادي ان الواحد بيقع يتعور وهو ماشي .
بلاش خيالكم المريض يصورلكم حاجات محصلتش
أسعد الله أوقاتكم
ودمتم بخير
