مونولوج بقلمى
أنا عشت حياتي باحب الجد واحب بجد واعيش مبسوط
هلاس حساس وباحب الناس ولحبي أساس وبعلو الصوت
باعلنها كمان انا كده انسان
وباقول يازمان اديني أمان
وانا اعيش متكلفت في سريري
ولا افكر يوم أفضح غيري
ولا مرة اتجسس ولا احسس
ولا مرة أفرط في ضميري
أنا كده غلطان؟
انا واد شقيان وساعات مليان وساعات كحيان انما عايش
الاقيني مشغول تلاقيني مسؤول وساعات متماسك أو بايش
وباقول أشعار وكلام جبار
وساعات بانهار من أي هزار
واتحول من صورة لصورة
واتفرج على سيما وكورة
وباعيش متخبي ومتداري
مع نفسي وبيتي وأفكاري
أبقى انا غلطان؟
أنا دمي زمالك عقلي الأهلي واحب الترسانة والدراويش
وبشجع مصر وانام العصر وأعيش في القصر ما قولش مافيش
انا شاري دماغي وصبري جميل
وباعيش بدماغي ويومي طويل
ولا باسأل مين ولا فين وبكام
ولا باحسد حد واقول يا سلام
ولا عمري بامصمص في شفايفي
ولا اعيش في السر ومتخفي
ابقى انا غلطان؟
لا بجد صحيح هو انا كده غلطان؟؟؟؟
بقلم - احمد خليفة:
مدرس لغة عربية بجدة
