الشعب الغريب المريب..

#سمواتي

ساعات تقف تحتار..فاقد التمييز و القرار.. تسب و تلعن فيه و في طريقته و في ثقافته و أوقات في غباوته و عفانته و نصبُه و جهله و فهلوته..

بقلم: سماء عماد

تقف مستغرب هو ضعيف ولا جبار...هو سند و لا تعبان و مُنهار..منهك زهقان قرفان عيشة طفح فيها الدم و شاف مرار..مش فارق معاه أي أخبار..عواصف رعد برق إعصار أمطار..ولا قطع مية و نور كهربا و لا قلة بنزين ولا سولار...

و في وسط كل مشاكله و بلاويه جواه دايماً الجدعنة و الرجولة اللي تخليه في وقت الأزمة و المحنة جنبك تلاقيه...

شعلة عطاء و محبة و كتف في كتف و حبة حبة تعدي بينا المركب في كل أزمة و جنبك واحد من غير تفكير ممكن يضحي عشانك و من غير أي تبرير..

شريكك في النيل و اللهجة و الوطن و الأرض و الطين..يقف يشيل عنك كتفه في كتفك و إيدُه في إيدك تلاقيك مستغرب حيران ده انا كنت بسب و بلعن فيك ليل و نهار..معقولة إنت اللي باجي في وقت كارهك و كاره مصريتي بسببك..

شعوب بتقوم و تقعد و احنا ولا هنا..تحذيرات، قرارات، حظر هنا و منع هنا و لا سفر ولا طيارات و قفل مطارات، أجازات و نشرات و تجهيزات و احتياطات، عدوى و إصابات و حجر صحي و منع اختلاط و عزل و وفيات و غضب إلهي و وباء من غير معاد في كل البلاد..و احنا ولا كإننا معاهم عالكوكب..تريقة هنا و كلمة هنا و بوس هنا و احضان هناك و الف سلامة و الف بعد الشر كل استفندي و خد ريفو و هتبقى زي الفل و ربنا يبعد عنا العين و الحسد و القر..

تستغرب ده برود ولا جهل ولا يأس ولا عجز ولا قوة ولا بأس ولا معادش بيهمنا حاجة ولا احنا بقينا مَهْزَأة؟

كورونا؟؟ كورونا إيه يا بيه؟ هيجيلنا بيها المرض؟ طب ما احنا عندنا أمراض من كل شكل و لون.. فيها إيه يعني و هو كان جرالنا إيه..كورونا إيه يا بيه؟ ما ياما قرفونا و بهدلونا و أكلوا حقوقنا و كتمونا و سَكِّتونا عشِّمونا و بالأحلام و الأوهام وعدونا وانت جاي تكلمني عالكورونا؟؟
صحونا على واقع جديد غريب مش فاهم هو صح ولا غلط حلم ولا علم ولا هم ولا فهم...

طرق و ميادين..و كباري لكل المواطنين و شجر شالوه و حطوا مكانه أسفلت و زفت و طين..مصر الجديدة القديمة غيروها.. شالوا الخضرة و الزرع و الشجر قال يعني والاسم بيطوروها..

و شوية بيفاجؤونا بتغيير في ميدان التحرير أصل دي واجهة جديدة و لا من غير ما نحس بينَسُّونا؟.. بيشيلونا و يودونا و يقررولنا و يغيرولنا و يمشونا..فمجتش سعادتك عالكورونا..

طب انتو مين؟ انتو اللي شايفكو عالة و جاهلين؟ ولا انتو اللي جواكوا الأصل و المعدن الطيب و القلب النقي الأمين؟ تقف تسأل نفسك انتو عارفين..طب فاهمين ولا عاملين نفسكوا مش واخدين بالكوا و مكبرين صابرين بتقولوا أمين أمين عشان وقت ما بتجيبوا أخركوا بتتقلبوا في ثانية ناس تانيين..

مننا و فينا و وسطنا كتير..كل التناقضات و المعاني و الأفكار...مفيش في الدنيا مسَلَّمات..و يمكن بنشتكي من بعض كتير..بس هما هما احنا احنا اللي نتنمر و نتريق و نزعل و نعترض و نعتذر و نستندل و نستجدع و نسترجل و نستهتر و نتقدم و نتعلم و نتألم و نستهلك و ننتج و نقع و نقوم و نخسر و نفوز و نشجع و نزعق و نندم و نفرح و نحزن و نوافق و نعارض و نرحب و نقابل و نفارق و نحس و نضحي و ندي...
و في الاخر عمرك ما هتلاقي ليه مفهوم...ولا طبيعة و مرجعية...هو خليط متجانس أو غير متجانس...بس ليه قوام لا يقاوم في الشعور بإنسانيته و فطرته الطيبة المختلفة و الغريبة..