عايز اشرب قهوه

يوميات مهندس مشاكس

بقلم: تامر راغب

كان في مصنع الادويه اللي كنت اعمل به في السودان راجل كبير في السن وكان بيجيب سندوتشات وشاي وقهوه من الكافيتيريا .

الراجل ده كان تقريبا كان من جنوب السودان وكنت باجد صعوبه في فهم كلامه .

المهم دار بيني وبينه الحوار الاتي في اول ايامي معاهم :

انا : عايز من فضلك قهوه .

هو : داير جبنه

انا : لا مش عايز

" وبعد ربع ساعه جاب طلبات لكل الموجودين الا العبد لله " .

انا : هو فين القهوه ؟

هو : انت مش قولت مش عايز

انا : لا طبعا محصلشي

هو : لاحول ولا قوه الا بالله
حتجننونا ولا ايه
انت داير شنو

قعدت ابصله في ذهول وانا فاتح بوقي مش فاهم حاجه وليه هو متنرفز كده

واحد من اللي قاعدين الله يكرمه قالي ياهندسه جَبَنَه ( بفتح الجيم ) يعني قهوه

فهو قالك داير جَبَنه يعني عايز قهوه

انت قولته لا مش عايز

رديت عليه : ياعم انا افتكرته عايز يجيبلي ساندوتش جِبْنَه ( بكسر الجيم )

كنت اول مره اعرف ان جَبَنه ( بفتح الجيم ) يعني قهوه

أسعد الله اوقاتكم
ودمتم بخير