الشنطه فين

مذكرات مهندس مشاكس

بقلم: تامر راغب

في كل مره كنت بسافر و اسيب فيها مراتي وولادي في مصر بكون مهموم وزعلان اني سايبهم وخصوصا اني بروح اقعد لوحدي هناك في السودان .

" انتبهت من شرودي علي نداء كابتن الطائره يعلن عن الوصول لمطار الخرطوم "

نزلت من الطياره وانا سرحان في الايام القليله اللي قضيتها مع اسرتي في مصر .

وقفت امام سير الحقائب في انتظار حقيبتي
مرت عشره دقائق
عشرون دقيقه
نصف ساعه

وابتدت الناس تغادر المطار وانا واقف مستني شنطتي !!!!!

ابتديت ازعق بعد مرور مايقرب من اكثر من نصف ساعه " هاتولي مسئول هنا اكلمه "

لقيت واحد محترم جاي علي صوتي العالي .

هو : مالك يازول عمال تصرخ ليه ؟

انا : عايز مسئول هنا اكلمه .

هو : اهو حضرتك واقف امامك
انا المسئول هنا .

انا : شنطتي لغايه دلوقتي مطلعتش علي السير
ومافيش غير شنطتين بس علي السير ودول مش بتوعي
انا عايز شنطتي .

هو : ممكن من فضلك تخفض صوتك وانا حشوف المشكله فين .

انا : بقولك شنطتي ضااااااااااعت
تقولي اخفض صوتي ؟؟؟؟!!!!!!

هو : ممكن التكت بتاع الشنطه اللي استلمته في مصر .

انا : بنفاذ صبر
اتفضل ياسيدي

الراجل توجه الي الشنطتين اللي علي السير
وراح ساحب واحده منهم

وراح حاططها قدامي وقالي اتفضل شنطتك

انا : بصيت علي الشنطه وقولتله دي مش شنطتي ،
شنطتي لونها ازرق
ودي لونها اسود وشكلها مختلف تماما عن شنطتي .

هو : بكل ثقه " التكت بيقول انها شنطتك ".

انا : فتحت سوسته الشنطه بحذر لقيت فعلا حاجاتي موجوده في الشنطه

بس دي فعلا مش شنطتي !!!!!!!

# قمت بالاتصال بزوجتي #

انا : هي الشنطه اللي انا مسافر بيها لونها ايه .

زوجتي : الشنطه لونها اسود ياتامر .
ليه في ايه ؟

انا : بصوت هامس واطي : اسود ازاي !!!!
مش هي دي الشنطه اللي انا جيتلك بيها من السودان لمصر ؟
الشنطه كان لونها أزرق !!!!!!!

زوجتي : لا ماهو انا اديتلك الشنطه الكبيره التانيه اللي لونها اسود .

انا : عرق غزير ومش عارف ارد علي الراجل اللي واقف قدامي وعمال يبصلي بتشفي وفوز .

" عادي يعني بتحصل "

الواحد ممكن يتلخبط في شنطته

مش كده ولا ايه ؟

ياربي هو انا موعووووود اتحط في مواقف بايخه كده علي طول

أسعد الله أوقاتكم
ودمتم بخير