قصيدة الشهداء
الحرب أسوأ مافيها الفقد
والمنتصر مهزوم
خللي الصور ع الرف
يمكن نحتاجها يوم
مش عايز أقول للصور
إزاى حصل بيننا
حرب الفراق
عشان ماتفضل ضحكتي
مصدر سعادتك
وحضني ليكى
شال ف برد فبراير
يدفيكى ف الغربه
خللي الصور
منوره ف برواز
خلينا دايما علي بعضنا العزاز
أوعى تخللي البحر
والسما
جوه الإطار الخشب
كإنه منظر شاذ
أنا محتفظ بالصور
ف المترو
والمطارات
والسلم
ريحه الكتاب
المطبخ الامريكانى
ف البانيو
ع السرير
ف سفرك الآخراني
ماتعيطيش الصور
في عيونى من تانى
الحرب أسوأ مافيها
ريحه الديتول
علي طلقه ف الأفارول
ودم ناشف
فوق زرار الجيب
ماقدرش يحمى القلب
مقفول علي الكارنيه
ولما ودعتك
حطيتي صورتك فيه
دخلت رصاصه العدو
ف أتنين
ماعرفوش مين
اللي أتقتل فينا
الحرب بتلخبط ف الكشف أسامينا
خللي الصور مبهجه
لو حتي كنا من ضحايا الحرب
الحب ف القلب
يفضل يعيش فينا
خللي الصور مش حزينه
زودى الكحل ف عيونك
ضيقي عيون المدينه
خللي أصغر عشه فيها تحتوينا
الصور ف الحرب لها ريحة الأماكن
مش مجرد لقطه ف الألبوم
الصور زى الهدوم
تسترك
بستر الحب اللي بيننا
ف حرب بشعه
كل جدران الصور
برطوبه ناشعه
ساحفه زى الدبابات
والعساكر
والألات
والبارود
طايشه
زى رصاصه بتعدى الحدود
أسوأ مافي الحرب الجديده
لا.... تفرق
بين مسالمين ف المحبه
والجنود
خللي كل صورنا مع بعض بعيده
عن أراضي المعركه
خليها فريده
ف الوضوح
والتجللي
والصمود
مش حقول للصور......... حاجه عنك
رايح أقول إنك سعيده
وقولي عنى
كان حبيبي ف الصور
ومات شهيد
