الفشل وقود الخبرة

سمواتي

قناعتك و إيمانك بإنك عمرك ما هتبقى محط إعجاب الجميع لا في الشغل اللي بتعمله و لا في شكلك و لا في طريقتك ولا تفكيرك و لا تخطيط لحياتك و لا حتى شخصيتك مريحة جدا و بتساعدك إنك تركز على الموجود..

بقلم: سماء عماد

النقد البناء شيء مهم جدا و الاستماع للرأي و الرأي الاخر شيء مطلوب عشان تطلع لقدام..

تَقَبُلك لفكرة إنك ممكن تعمل حاجة و تطلع عاجباك جداً بس متعجبش اللي عملتهاله محتاج طاقة و مجهود و تدريب عشان تبتدي تعرف تتعامل مع المواقف اللي زي دي..مهما طلعت حاجات حلوة دايما هيبقى ليك منتقدين شايفين الأمور بزوايا تانية يمكن متكونش واخد بالك منها و دايما هيكون ليك أعداء نجاح بيكسروا المقاديف و يوقفوا المراكب السايرة..

ممكن مثلا معيد أو دكتور يبقى شايف أنه بيبذل اقصى جهده في أنه يفهم الطلبة بس فعلياً مبيفهموش منه حاجة..ممكن ميكب أرتيست تعمل لواحدة ميكب يبقى من وجهة نظرها حلو جدا بس ميعجبش اللي عملتلها.عادي

ممكن واحد يبقى طالع بتريند أو فكره جديدة هو مقتنع بيها و عاجباه بس تبقى متشافه إنها وحشة..

الفكره كلها إن ازاي توازن بين إيمانك بقدراتك و تمسكك بوجهتك و رؤيتك و بين إزاي تحترم المحيط و رأي الناس خصوصا المحيطين بيك..

و الفكرة برضو في الطريقة اللي الواحد بيتعرض فيها لهجوم او عدم تقبل من الناس او رفض لمجهوده او اللي بيعمله..بالراحة شوية..

الدعم و التشجيع شيء مهم و جميل..و محدش بيبدأ مبدع و شاطر...الفشل و التجربة وقود الخبرة..

مش هتتعلم و تبقى محترف غير أما تقع مرة و اتنين..فيكون عندنا رحمة باللي لسه بادئ و بيجرب و بيعافر.

#سمواتي