رد فعل

كراكيب أميرة

بقلم أميرة الزيات

أكبر مصيبة أو أذية ممكن تعملها فى أى إنسان هو إنك تخليه فى صراع بين أصله الطيب أو الفطرة اللى مخلوق عليها وبين رد الفعل اللى المفروض بيبقى نتيجة تلقائية لفعلك..

الصراع دا بيبقى أصعب حاجة ممكن الإنسان يعيشها..
إحساس مميت، مميت بمعنى الكلمة.
نفسياً بيكون مدمر..
بيبقى بيعافر بين فطرته أو دينه أو أخلاقه وبين إحساسه إنه عاوز ياخد حقه، يشفى غليله، يريح صدره..
فى اللحظة دى بيكون الإنسان أضعف مما تتخيل؛ مغيب ورد فعله أكبر مما يتوقع..
بيبقى حبيس الانتقام، جواه جبروت..
الانتقام ده معظم الوقت بيوصل إنه بيبقى انتقام شيطانى..
آه بدون مبالغة انتقام شيطانى..
ماتتخيلوش الحسرة وإحساس الظلم اللى بيبقى جوا قلب الإنسان!
ياريت مانضغطش على بعض ونستغرب من رد الفعل!
ماتقولوش الناس بتتغير ليه غير لما تشوفوا أفعالكم..
كل إنسان جواه مراية بتعكس اللى بتشوفه..
دا حصاد أفعالكم..
ماتبصش لرد الفعل شوف فعلك..
ربنا يقوينا يا رب، ويهدينا وقت رد الفعل.
لنا الله!