أنا أهلاوي ياناس

يوميات مهندس مشاكس

# اصحابي وحبايبي الزمالكاويه : لكم مني كل الحب والتقدير # كان في ماتش لنادي الزمالك في إحدي البطولات العربيه 

بقلم: تامر راغب

تشاء الظروف ان انا وابني عمر نكون قاعدين في معقل من معاقل الزملكاويه

كل اللي قاعدين بيشجعوا الزمالك باستماته مش طبيعيه وتعصب واضح جدا

وأنا وابني مش بنتفرج علي الماتش لغايه ما بدئوا ضربات المعاناه الترجيحيه .

قمت وقفت انا وابني عمر علشان نشوف اللي حيحصل .

وطيت علي عمر وقولتله بصوت واطي اوعي تبين انك اهلاوي بدل ما ناخد علقه موت هنا

خلينا نشجع الفريق التاني اللي بيلعب قدام الزمالك بقلبنا بس ( وكان فريق من الفرق المصريه بالصدفه) .

وكل ما الفريق التاني يجيب جول في الزمالك نخبط برجلينا في الارض قال يعني زعلانين واحنا اصلا نفسنا نتحزم ونرقص .

وكل ما الزمالك يجيب جول نهيص مع الناس ونقول " ايوه بقي "

لغايه آخر ضربه ترجيح للفريق التاني لو جابوها يكسبوا .

ودخل اللاعب وراح مطير الكوره في الهواء

وانا وعمر حيغمي علينا من القهرة ولكن بصوت عالي هيصنا مع الناس .

المهم الزمالك ضيع الفرصه بتاعته هو كمان

وجت فرصه للفريق التاني وجاب الجول وخرج الزمالك من البطوله .

أقسم بالله اول ما الفريق التاني جاب الجول الأخير ده

انا وعمر من غير ما نحس بصرخه رجل واحد وفي نفس واحد صرخنا "جوووووووووووووول "

وفجأه صمت رهيب ولقينا الناس كلها بتبصلنا بصات غريبه

وواحد من اللي قاعدين بيقول هو في ايه ؟

وياعين امه ابني عمر رد بكل فخر

وبصوت عالي " انا اهلاوي ياناس " .

طبعا مش حقدر اذكر كل التفاصيل والشتائم اللي حصلت لحضراتكم هنا لان الرقابه طبعا لن تسمح لي بذلك

بس اللي انا متأكد منه ان احنا الحمد لله ما زلنا نتنفس .

وفي الآخر وباعلي صوتي بقولها وانا قاعد في بيتي بعيد عنهم " انا أهلاوي ياناس "

# ملاحظه مهمه : الصوره المرفقه لي انا وابني عمر قبل ما ننضرب

أسعد الله أوقاتكم
ودمتم بخير