فيروزات

كراكيب أميرة

بقلم أميرة الزيات

ياااااه على جمال فيروز لما قالت "أنا لحبيبى وحبيبى إِلِى"!
يا ترى الثقة اللى عند فيروز دى جت منين؟
فيروز لما قالت "أنا لحبيبى" أكيد قالتها لأنها واثقة فى حبها أوى، وواثقة أكتر فى نفسها..
الثقة دى جت من قوة الحب، ودا اللى خلاها تهدى نفسها لحبيبها، وتخص نفسها ليه فى قولها "أنا لحبيبى".
نهت أى جدل؛ أهدت نفسها بكل ما فيها لحبيبها..
ودا معروف فى الحب لما تحب أوى بتبقى روحك وقلبك وكيانك كلك كدا على بعضك ملك لحبيبك..
طب لما تقول: "وحبيبى إِلِى"؟! إيه دا؟! دى بتتكلم بلسانه!
يا ترى إيه الثقة اللى خلت فيروز تقول كده؟! هى للدرجة دى واثقة فى حبيبها والحب اللى بينهم اللى خلاها تفكر وتاخد القرار وتتكلم بلسانه وتقول "وحبيبى إِلِى"؟!
دا يخلينا نوصل إلى إن قوة الحب فى صدقه، واللحظة اللى الحب بيوصل فيها للصدق بيبقى حقيقة لا يمكن أن تُنكر..
شىء واضح للجميع وضوح الشمس..
لا أحد ينكر أن قوة الحب فى اندماج المحب والمحبوب؛ بيبقوا: عقل واحد، روح واحدة، نفس واحد، فى جسدين، نفس الفكر، نفس القرار، حتى الملامح بتتشابه!..
أعلى مراسم الحب روعة الحب، ودى الحالة اللى عاشتها فيروز، ودا اللى إداها القوة والثقة فى كلامها وقالت "وحبيبى إِلِى".
بس يا ترى النهارده فى زمنّا مين اللى واثق فى حبيبه للدرجة اللى تخليه يقول بكل ثقة وفخر مثلما قالت فيروز "وحبيبى إِلِى"؟
واللا حتى واثق فى نفسه وحبه ويقول "أنا لحبيبى"؟
سؤال يطرح نفسه للمحب والمحبوب: مين اللى يقدر يقول فى عزة "أنا لحبيبى وحبيبى إِلِى"؟
شابو فيروز شابو الأخوين رحبانى..