"نقطه ومن أول الصبر" ديوان محمد جمعه في معرض الكتاب
سبق للشاعر إصدار دواوين
روائع البستان / شِعر فصحى
ما تحاوليش / شِعر عامية
في البلالة / شِعر عاميةومن ديوان
ومن ديوان
أهـــــــــــلا بـكـــرة
***************
أهلا بكرة بشمس جديدة
ح تشرق بدري
وإحنا في قاعدة وليلة سعيدة
حلمنا يجري
ونقول بكرة الحال يتعدل
وقبل الوردة الحلوة ما تدبل
راح تسقيها
وقت شروق الشمس أيديك
بكرة ترعرع .. و ح تتفتح
كل بيبان الرزق عليك
وإياك تيأس
خللي آمالك نصب عنيك
قبل ما دبة يأس في قلبك
تهدم كل اللي بيحيك
بكرة ح تفرح
لما امالك هتصحيك
تلقي الفجر
بعد الليل الحالك طالع مستنيك
تطلع دوغري وقلبك قبلك
راح يتأمل قدرة ربك
راح يتوسم خير الدنيا
لما الرزق لحدك يجري
في كف أيديك
أوعي يا صاحبي
مهما أتأخر فجرك تيأس
مهما حلمت وليلك طال
لازم شمس الدنيا ح تطلع
لازم بكرة الضاحك يرجع
وح تستقبل فرحه وتسمع
صوت بيقولك :
إن الدور دلوقت عليك
و أرمي همومك من ورا ضهرك
ياله أتجدعن ....شمر وأسعي
رزقك جاهز مستنيك
أهلا بكرة
بشمس جديدة ح تطلع بدري
عمري ما ح أيأس
ولا ح أتشائم
وح تتحطم
كل جذور الشك في قلبي
لما ليالي القهر تعدي
وبكرة يهل ويوفي بوعده
وتصبح دنيا جديدة علينا
فيها جبين الحر مندي
فيها الحب علينا مغطي
ونقول بكرة الحلو أهو جانا
ونعيش أحسن من دلوقتِ
ندعي المولي يديمها علينا
هو لوحده عنده القدرة
عنده الخير ...منه النعمة
عنده العزة اللي تقولينها
وعلينا نسعى لرب العزة
لجل ما تبقى حياتنا هنية
والخير يفضل ملو أيدينا
ونقول دايما
أهلا بكرة .......... أهلا بكرة..
