مطعم فرحات

يوميات مهندس مشاكس

كانت بيني وبين مديري في شركتي القديمه قصص وحكايات وحوارات لاتنتهي ابدا .

بقلم: تامر راغب

كانت بيني وبين مديري في شركتي القديمه قصص وحكايات وحوارات لاتنتهي ابدا .

في اليوم ده كنت قاعد مع مديري الصبح بندردش مع بعض في امان الله قبل ما ندخل في حوارات الشغل اللي كانت بتخليه يفقد اعصابه بشده مني الحقيقه مش عارف ليه..!!!

المهم كان بيحكيلي انه راح هو واسرته الكريمه في الليله السابقه لمطعم فرحات وان الحمام عندهم كان روعه وانهم استمتعوا جدا بالاكل هناك .

خلصنا دردشه
ودخلنا في موود الشغل واعطال المكن
كلمه منه
كلمه مني
رد منه
رد مني
ابتدي يفقد اعصابه وقعد يزعق بصوت عالي وانا ارد عليه بكلمه او كلمتين فتوتر جدا واعصابه فلتت منه وهو عمال يزعق وفجأه لقيت وشه بيصفر ومش عارف ياخد نفسه واترمي علي الكرسي وقعد يفك الكراڨت اللي لابسها وعمال يشاورلي علشان الحقه .

جريت عليه مش عارف اعمله ايه
ومديره مكتبه جت تجري
وكلمت العياده وقالت للدكتور إلحقنا بسرعه ده مش عارف يتنفس .

وصل الدكتور وانا ومديره مكتبه واقفين مرعوبين عليه
والدكتور فكله القميص وقعد يدلك صدره
وقاسله الضغط وهو مرمي علي الكرسي مفرهد بجد .

الدكتور : إهدي يا باشمهندس ضغط حضرتك عالي جدا .

مديري : من غير ماينطق بيبصلي بغيظ وعنيه بطلع شرار وهو بيبصلي..... ومش قادر يتكلم .

مديره مكتبه : بتبصلي وهي بتقول منه لله اللي كان السبب

# شكلها بتتكلم عليا انا

الدكتور : عمال يحاول يخلي مديري يتكلم وبيسحب منه الكلام بالعافيه
فالدكتور عايزه يتكلم علشان يطمن عليه فبيسأله هو حضرتك اتعشيت ايه امبارح ؟

انا : " بصوت عالي " كان بيتعشي في مطعم فرحات حضرتك

فطبعا الدكتور بدأ يركز معايا ومديري في حالة من الذهول والتوتر العالي

فكملت كلامي وقلتله :
الظاهر انه تقل في اكل الحمام شويه
وده اللي تعبه كده حضرتك

الدكتور اتفاجأ ان مديري عمال يشاورله هو ومديره مكتبه عليا
وراح مصرخ باعلي صوته " طلعووووووه بره .....حيموتني "

الدكتور ومديره مكتبه اتفتحوا في ضحك ومديره مكتبه عمال تدفعني خارج مكتب مديري
وانا مش فاهم مديري متضايق ليه

مش لازم احكي للدكتور اللي اكله علشان يكتبله العلاج الصح

اسعد الله اوقاتكم
ودمتم بخير