هدايا الشراء

يوميات مهندس مشاكس

" من مذكراتي مع مراتي " 

بقلم: تامر راغب

وانا راجع من شركتي القديمه اللي كانت ناحيه الهرم لبيتي في مدينه نصر كان لازم اعدي علي هايبر كبير في المعادي ليه فروع في أماكن كتيره

وكنت في الاسبوع مره ولا اتنين لازم انزل كده الف فيه

وطبعا مبطلعشي بايدي فاضيه لازم اكون طالع بمشتريات وبالتالي جيوبي تبقي فاضيه .

المشكله بقي لما كنت برجع البيت وتحصل مشاده مع مراتي وتقولي انت جايب حاجات مش محتاجينها وبتخلص مصروف البيت في حاجات غير اللي البيت محتاجها

وكل مره نفس الحوار لغايه ما وعدتها اني مش حروح تاني .

المهم في يوم وانا راجع من الشغل لقيت الهايبر ده متزين مش عارف بقي عيد ميلاده ولا بدايه سنه جديده

المهم بصيت بطرف عيني كده وحاولت اني معديش بس مش قادر

وانا وعدت مراتي اني مروحش

فقولت اركن كده علي جمب واتصل بيها .

انا : سلام عليكم حبيبتي .

مراتي : متروحش ياتامر .

انا : بتعجب واستغراب وانتي عرفتي منين اني بكلمك علشان كده

هو انا متراقب ولا حاجه ؟

مراتي : لا متراقب ولا حاجه بس اتصالك في الوقت ده بعد خروجك من الشغل يبقي عايز تروح الهايبر .

انا : طيب بصي مش حشتري حاجه حدخل ابص واتفرج علي العروض .

مراتي : اممممم ماشي ياتامر لما نشوف .

ركنت عربيتي ونزلت

بعد مادخلت لقيت زحمه كبيره قوي امام البوابه الداخليه

قربت كده احاول اشوف في ايه

برضو مش شايف

المهم كتف يمين وكتف شمال لغايه ما دخلت جوه الزحمه لقيت ناس ايه بتسحب كوبونات والراجل بتاع خدمه العملاء يخربش الكوبون وهوووووب

مبروك يا استاذ كسبت مسجل
مبروك ياهانم كسبتي طقم حلل للمطبخ
مبروك يا استاذ كسبت سخان
مبروك يا مدام كسبتي طقم كاسات واطباق .
مبروك يافندم كسبت سماعات استيريو .

بجد شفت ده بعيني

فسألت هم الناس دي دخلت مسابقه ولا ايه

ردوا عليا الناس اللي حواليا قالولي حضرتك تروح تشتري باكيه بيبيسي او سفن كانز اللي متغلفه دي

" كانت الباكيه تعمل تقريبا ٢٠ كانز " وبعدين علي كل باكيه تاخد كارت من الراجل المندوب ده .

حيخربشه وتكسب حضرتك هدايا .

جريت زي المجنون وسحبت عربيه من عربيات الشراء وجري علي الزحمه اللي جوه علي بواكي الكنزات

وبايدي اليمين والشمال ورجلي زاحمت لغايه ما اخدت ٣ بواكي كانز

" ستين كانز بيبيسي علي سڤن ) ورصيتهم فوق بعض علي العربيه علشان اسيب مكان فاضي في العربيه احط فيه الهدايا

وقولت برضو اروح اجيب عربيه فاضيه تانيه من عربيات الشراء علشان احط فيها الهدايا بس للاسف ملقيتشي عربيه تانيه لان الاقبال في اليوم ده كان تاريخي .

المهم روحت وقفت في طابور طويل عريض لغايه ما جه دوري

المندوب بص علي البواكي اللي في العربيه وشاف ريسيت الدفع وقالي حضرتك كده ليك ٣ كوبونات

اتفضل حضرتك اسحب ٣ كوبونات

سحبت واحد من ناحيه اليمين وواحد من ناحيه الشمال وواحد من النص .

قعد يخربش الكوبونات التلاته وبعد ما خلص قالي مبروك حضرتك كسبت معانا ٦ كنزات بيبيسي .

بصيت للراجل وانا في قمه الذهول والغيظ والاحباط وقولتله انت بتستهبل وريني الكوبونات دي

مسكت الكوبونات لقيت في كل واحده مكتوب مبروك كسبت ٢ كانز بيبيسي .

حطيت ٦ كانز في كيس من اكياس كارفور ورحت ركبت عربيتي وطول الطريق وانا راجع مش عارف حقول لمراتي ايه

بجد حاجه تكسف

الحظ عارف اصحابه

وصلت بالعربيه تحت البيت ومش قادر انزل من العربيه لان رجلي مش شايلاني

المهم توكلت علي الله وحطيت الثلاثه بواكي الكانز علي صدري

ومسكت كيس الكانز اللي فيه سته كنزات في ايدي وطلعت العماره

طبعا مش عارف اطلع المفتاح من جيبي افتح الباب

ولا عارف اضرب الجرس فخبطت برجلي علي الباب

ميييين ؟

افتحوا ياولاد

المهم مراتي فتحتلي الباب وبصت بذهول وقالتلي :

مراتي : هو ايه ده ؟

انا : دول ثلاثه بواكي كنزات بيبيسي

والكيس ده في سته كنزات بيبيسي .

مراتي : بفرحه
لا بجد
اشتريت سته كنزات بيبيسي وكسبت ٦٠ كانزايه .

انا : مش قادر ارد بس في الاخر استجمعت شجاعتي وبصوت عالي صرخت
" اشتريت ٦٠ كانزايه وكسبت سته .

طبعا مش حقدر اسرد لحضراتكم هنا ايه اللي حصلي ولا صوت مراتي العالي اللي سمع ام العماره كلها

ولا التأنيب المستمر لمده اسبوع كل ما تشوف وشي وهي تقولي " ماقولتلك ماتروحش "

وأنا بسمع ومطنش .