قـال يا مـقال
الأمثال الشعبية والحكم المصرية القديمة جميعها نتيجة تراكمات وخبرات السنين "من أيام جدي وجدك, قالوا زمان قبل ما تناسب حاسب وإن كبر أبنك خاويه ومن أجل الورد ينسقي العليق واللي بيته من زجاج ما يحدفش الناس بالطوب وقالوا كمان الصاحب ساحب, وجميع تلك الأمثال والحكم القديمة تحمل بين طياتها الكثيير والكثير من التجارب الحياتية والعبر, قبل ما تناسب حاسب وفكر وقرر ناسب اللي شبهك اللي تحفظ بيتك وتربي أولادك تربية صالحة, وإن كبر أبنك صاحبه وخاويه وقرب منه علشان مايصاحبش أصدقاء السوء ويضيع منك زي كتير وكتير غيره ويضيع معاه حلمك في عكاز سليم تتسند عليه لما تكبر, ومن أجل الورد ينسقي العليق يعني من أل عين تكرم ألف عين علشان خاطر اللي تحبه استحمل, واللي بيته من زجاج يعني كلنا عندنا زنوب وربنا ساترها علينا بلاش نبص لبعض ونقتحم خصوصية بعض ونجيب في سيرة بعض سواء بالحق أو الباطل.
والأمثال كتير ولكن مثل الصاحب ساحب بالتحديد من أخطر الأمثال الشعبية التي تحمل بين طياته معاني كثيرة ومخاطر أكثر, "الصاحب أوقات كثيرة يكون أقرب من أخوك أبن أمك وأبيك لأنك بتختاره بنفسك علي حسب دماغك" وهنا مكمن الخطورة في حالة أنك أسأت الاختيار, صديق السوء هياخدك علي طريق الانهيار والانحدار لكل ما لذ وطاب من المحرمات سواء المخدرات والإدمان أو الانحراف والتوهان, يضيع حياتك وتنسي اللي فاتك وتموت ذكرياتك ويفوت الأوان, وصاحب صاحبه اللي للخير ياخده يفهمه ويوعيه ينصحه ويداويه ويبعده ويحميه من كل شر يؤذيه, أو صاحب أناني وياه تعاني يضيع حلمك في بكره من أول اللي ذاكر ذاكر لغاية ما تيجي تجرب دي هي سيجاره "وعلي رأي الأغنية الحقيرة سيجارة جابت جوان وجوان جاب حباية".
"وفي صاحب علي الخير يدلك وعمره ما يضلك أو يذلك, علي الخير يشدك, علشان كده يا صاحبي بقولك, صاحب اللي شبهك اللي منك, وأبعد عن أبو كلام معسول اللي يهينك ويضحك الناس عليك ويقولك بهزر, اللي يبيعك ويسيبك ويكلمك وقت ما تكون مصلحته معاك, صاحب اللي شبهك اللي تأمن له وتطمن له مش اللي يجرك للرذيلة ويقولك العمر لحظة, وبين لحظة ولحظة تضيع ويضيع معاك حلم أبيك ليك وحلم أمك فيك, يضيع العمر يا ولدي, أوعاك يا ولدي تقرب من الخاين الخسيس وتقولي أصل صاحبك علي عيبه, أبعد عن اللي يقولك الراجل بجيبه, والشطارة والفهلوة أنك تجيب الجنيه" لا وألف لا الراجل بأخلاقه وشرفه قبل ما يكون بجيبه, يجيب الجنيه بس بالحلال, أبعد يا ولدي عن الحرام, الحراك بياخد في وشه كل حاجة, وربك عالم وموجود وكل مقيد ومكتوب في كتاب لا يترك صغيرة ولا كبيرة إلا أحصاها.
شباب كتير ماتت وبتموت من السموم والهموم وشباب كتير بتعيش وتحقق حلمها في بكره بعيداً عن أوهام الثراء السريع وهوجه الترند والموضة بعيداً عن مجاهدي التيك توك ومليارات غسيل الأموال في السوشيال ميديا ضمن مخططات وحروب الجيل الرابع, أطفالنا من حفظة القراءن وشباب العلماء والباحثين وأوائل الثانوية العامة وشباب البرنامج الرئاسي ومتطوعي التحالف الوطني وغيرهم الكثير والكثير من شباب مصر ورجال المستقبل, "اختار اللي شبهك ومتنساش يا وليدي أن الصاحب ساحب علشان كده لازم تختار صح" .. حفظ الله مصر وشباب مصر ومستقبل مصر.
بقلم : محمد إمام
[email protected]