إيه يا جدعان ؟؟
بقلم : مياده الشربيني
إيه يا جدعان
ولا واحد ف العاركه يبان
شايفين أرواح لحظه وتطلع
وإنتم عاملين ف التوهان
إيه ياجدعااان
مين علمكم مين رباكم ؟؟
مين غرس القسوه و قواكم ؟؟
مين أسس بنيان وكيان ؟؟
بس سؤال يا شهود ياعيان
حد تصرفه كان إنسان ؟؟
والله نبض القلب بيبكي
وعقلي إتشل من الغليان
طب كمسري جاحد وجبان
قلبه طاوعه
شيطانه وسمعه
لحظه فتح
ف القطر بيبان
الركاب قاعدين ساكتين؟؟
فيلم تراجيدى ليه متابعين؟؟
الله يلعن موت النخوه
موت الجدعنه ف الإنسان
إيه يا جدعاان
كل الأيام كده أوجاع
كله ضميره مات وإتباع
مبنلحقش نفوق من راجح
ندخل على كمسري تباع
يا كتير ياضماير بتموت
قسوه قهر جحود جبروت
إمتى تروح يازمن وتفوت
ونروح بقا عالم النسيان
إيه ياجدعاان
صيت الإجرام ليه كدا ذاع ؟؟
أسهل حاجه الموت ف نزاع ؟؟
كله سلام بقا كله وداع
هيجان أدى خلاص ل جنان ؟؟
مش كفايانا بقا أحزان ؟؟
قربو حبه من اللي خلقكم
إبليس ف ذنوبكم غرقكم
بسطها عليكو وهيأكم
سهل القتل بسيط ياجبان
والله نبض القلب بيبكي
وعقلي إتشل من الغليان
إمتى هنرجع زى زمان ؟؟
نخوه رجوله
يبان ف الصوره
إبن بلد والناس جدعان
يصحى ضميرنا و نسند غيرنا
ويبقا الخير ليه وجود وكيان
نطلع بقا م العتمه كفايه
موت وخراب مش قصه حكايه
نطرد من على سطح بيوتنا
بوم عشش فيها على غربان
إمتى هنرجع زى زمان ؟؟
نخوه رجوله
يبان ف الصوره
إبن بلد والناس جدعان
علشان ممكن وقتها بس
تجوز الرحمه
على الإنسان
