إختار صح

بقلم ميادة الشربيني

لما تحب تفضفض يوم
شايل حمل جبال وهموم
ضلمه الدنيا عتمه غيوم
إختار صح
لما يكون قلبك موجوع
ومعذبه كده كام موضوع
حزنك جواه مش مسموع
إختار صح
إختار حد يحس بوجعك
لما يزيد ألمك جواك
حد بيسمع دقة قلبك
لو كل الناس مش سمعاك
حد يلملم كل جروحك
حد وجوده يطمن روحك
حد يطبطب ليك بيهون
لو كل الدنيا معانداك
إختار صح
إختار حد يعيش أوجاعك
ضعفك لما تكون مهموم
حد يسامحك لما بتغلط
وقت الخنقه مش بيلوم
حد بتهدى معاه أمواجك
زى البحر فوقت العوم
إختار صح
إختار قلب تعيش جواه
نبضه لنبضك روح وحياه
لو يوم تضعف تلاقيه جنبك
بيقويك وبتقوى معاه
حد تكمل بيه مشوارك
حد قريب من أفكارك
حد يكون ليه دور فقرارك
سندك وانت هدف قواه
حس بقلبك واشرك عقلك
واختار حد تكون له حياه
إختار صح