طلتك بشرى جميلة

شعر: مياده الشربيني

عم يا بتاع القديم
منلقيش عندك زمنا ؟؟
أقصد الزمن الجميل
إللي كان يشفى العليل
الكبير فيه والصغير
والله جدع وأصيل
كنا نلعب ف الشوارع
كله يتفرج و سامع
قلب بالسعاده راجع
صبح كان ولا ليل
لما أحتاج يوم لحد
على صحبى
علطول بميل
أحلى معنى للصداقه
جوه الجسم كان فيه طاقه
كان فيه صحه وروح و حيل
الدكاتره ف العياده
بالساعات تقعد تنش
كان فيه بركه فكل حاجه
لو تطيب مافى غش
ناس بتدى و ناس سند
الجيران صحبه ووتد
عزوه اهل صحاب
عدد
جنب بعض وهو وش
مش بتتلون وشوش
ناس يخافوا ميختشوش
ناس تحبك إنهارده
تانى يوم تقلب وحوش
الرضا كان ف القلوب
لو يناموا جوه عش
عم يابتاع القديم
مش تقوللى كان زمان
وإن كله علينا هان
وانك بعت كل حاجه
حب خير إحساس أمان
مد إيدك شوف وبص
جوه صندوقك ياعم
خرج إللى باقى منه
عطره بس يفك هم
إنت مش عارف
اللى فيها
أيامنا العذاب مليها
ناس تتاجر بالقلوب
وناس تخرب موت ودم
دا الزمن والله لم
بس تعرف لما شوفتك
حسيت جوايا بتفاؤل
إنت جايلى صدفه يعنى ؟؟
ولا عنى حد سائل ؟؟
ولا أقولك مش مهم
مش هيفرق دا معايا
المهم أسمع حكايه
من حكاوينا القديمه
أى حااجه
إنشالله ريما
بس رجعني لزمان
وإبتدى ب كان ياما كان
خدنى بيها لألف ليله
لسنين عدت
ياااه طويله
فرحة العيال ف لمه
جوه بيت فكل عيله
عم يابتاع القديم
حتى لو خلص الزمن دا
والمحن صعبه وجامده
القلوب ع الذكرى سانده
يكفيها العطر
ف سيره .
و مش هنيأس
هنلاقيها بردو راجعه
ف إيد تطبطب ماسحه دمعه
أو ف صحبه أو ف جيره .
عم يابتاع القديم
طلتك بشرى جميله .