الوضع حرج
وانا بطلع برايا الصبح ادور عن نفسي
وارجع اخر ضوء
شعر: ناصر دويدار
وانا بطلع برايا الصبح ادور عن نفسي
وارجع اخر ضوء
بلا ضوء
بلا شمس تدفي جيوبي
سريري
الجدران
الوضع حرج
وبلادي بترميني يوماتي ليد ولادها
وسنانهم
بيمصوا دمي
بيصفوني هيكل عضمي
متفرهد
من أول خيط للفجر
لأخر حبل الضلمه
الوضع حرج
وأنا ببعد
وعيالي بتبعد عني
وماتت أمي
وأبويا وراها
ضهري بقي عريان
والشتا علي باب الروح بيخبط
وحداني ومتورط
ف الزحمه
الوضع حرج
صوتي مش،طالع
مع اني بزعق
وبنادي ع العصافير
والورد
والعدل
والحب
وأصحابي اللي كتافي أتنحتت..
عيش وغموس لعيالهم
صوتي مش طالع
مع إن عيوني بيطلع منها يمام بيرفرف
وشي بتنبت أشجار رمان
ووداني بيتدلدل منها عناقيد من نور
الوضع حرج
وأنا......
لسه ضلوعي بتنور توت
رجلي حصان بيفوت
ودراعي حضن كبير
بيكفي الملكوت
الوضع حرج
مع إني لسه عايش
..كلمه
بتفحر
بتزعق
وتفجر ينابيع الصوت
الشاعر...كلمه
عمرها....ماتموت
