مولد يا دنيا

سمواتي

توهة و زحمة في مولد كبيييير...مولد الدنيا براااح أشكال و لخبطة و ناس داخلة و ناس طالعة و ناس صالحة و ناس طالحة..فيها الطيب و فيها الشرير..

بقلم: سماء عماد

ألوان..أصوات عالية و أصوات واطية..أفكار كتير مرتبة و منعكشة..
شخابيط و كراكيب..شبابيك مفتوحة و شبابيك مكسورة و شبابيك مقفولة..
نجاحات و إخفاقات...لعب كتير و بهلوانات..
حظ فوق و حظ تحت.. اللي لقى نفسه و اللي تايه وسط المولد مش عارف هو فين ولا هو مين..
انت و حظك.انت و شطارتك..
سيد الكل و الكل في الكل..و اللي راضي و اهي عيشة فل..واللي ماشي جنب الحيط و ملوش دعوة بالكل..
هتلاقي كتير متلمعين بس جواهم خربانين..وناس كتير متوسطين بس جواهم بني ادمين..و ناس كتير متربين هما عايشين بس من جوه ميتين..
اللي ناصح و اللي فالح و اللي صايع و اللي ضايع و اللي شاريها و اللي بايعها و اللي فهمها و عرف يظبطها..
شوية حظ على فهلوة..تكسب الليلة كلها..
تمشي عدل بما يرضي الله..هتشوف و تتعامل من اللي حواليك بما لا يرضي الله..
مولد الدنيا مليان..اللي جعان و اللي شبعان و اللي زهقان و اللي تعبان و اللي مبسوط و اللي فرحان و اللي على طول عيشته توهان..
و اهي شوية كراكيب في دماغي..