اخر ما تجلي الحزن
متكحله عيني بليالي الشوق
والصبر فاض مني
والكف متحني من لمسه دبيح الطير
والمشي عكس السير
كلمات رضا عبد النبي
قام هد حيل الروح
عشت السنين مجروح
والوحده سرقاني
بلقاني اخر الليل
في غربتي لوحدي
لا ليا صاحب يوم
قام خدني م الوحده
ولا حتي كانلي حبيب
كل. القلوب بتغيب
وقت اما نحتاجها
وبرغم دي الوحده
بنسي الهموم وبروح
كل اللي عاش طيب
هيموت اكيد مجروح
وانا خوفي بس اموت
والجرح. واكل قلبي
عايشه الوجع وبخبي
واضحك وابانلكو عادي
دايما بعادي الخوف
وبكايا شئ مألوف بالنسبه لسريري
ف الحب تأثيري يشبه حبوب بنادول
وانا روحي رايحه لدول ولدول
تشبه ساعه بندول
والحكم ف وقوفها هو اكتئاب ف الروح
نغز الجروح ف القلب
هو السبب ف الحب
عمر البلوب ما تحب غير اللي يجرحها
طمنها ريحها
تقلب عليك وتقوم
تشبه ضباب وغيوم
يا حي يا قيوم انا قلبي مات مني
فالهمني اعيش من غير ما قلبي يدق
جوايا روح بتذق في مشاعري بالمعكوس
وكأن كل الناس السهم
وانا وحدي بس القوس
ولابد اني اساعهم
مصلوب لاوجاعهم واوجاعي هم كبير
زي الدوا بتحذير
مباح لكل الناس
وممنوع لامثالي
اوجاعي تحلالي
تصعب عليا انا نفسي
ف الهم وحداني
وف الجرح وحداني
وف الدنيا وحداني
وف الفرح شئ تاني
بلم القلوب حواليا
السر ف الحنيه
يظهر صفاء النيه ف الضحكه قدامكو
اقدامكو سابت اثر م الخطوه علي قلبي
وعنيا لضمه البكا ف جفوني باستمرار
اسرار ورا اسرار
بالجرح مخفيه
اقدامي محفيه م الخطوه حواليكو
وايديكو حلمي تكون ف ايديا مشبوكه
دالكدبه محبوكه والخيبه اني بصدق
دا الكدبه محبوكه والخيبه اني بصدق
