حلم البراءة

شعر : محمد هاني

متصدقوش الغلط
أنة سلاح فتاك
وانة ملوش اسباب
أو خالي من التبرير
وإن الي عاش
عمرة يحلم بكونة ملاك
يصعب علية يوسف
لو يترمي في البير

ناح الحمام ومهما ينوح
مين في السما يسمع
غلط البريء وارتاح
ومين للحمام يشفع
صوت البكا مبحوح
في الفضا ومين
لصوت البكا يمنع
شد الحمام جلد السما
وكتب امنيتة بدمعة
كات السما شايفة القصيدة
والارض مش سامعة
وطي الحمام علي ودن البرئ
تمتم بكامل ايات الحسن
وبلغة دعوتة
علي أن يظل السر محفوظ
في جفون البرئ من كل زيف
ولا ينقلوش حتي من ودن للتانية
صاح البرئ
معقول يكونلي جناح واقدر اطير
لبعيد
صرخ الحصا عالارض وانا مين
هيقبلني
اذا كان جميع المخلوقات قصدوا
بيبان السما
نزلت دموع السما زخات تمسح
جبين الارض
اصل السما والارض زي الصلاة والفرض
لاتنين بروح واحدة
ومفيش الم اقوي من خدوش الروح
اكن الارض نابتة من ضلع السما
أو أن السما حلقات في جوف الأرض
نزل الحمام للأرض يلم دعواتة
من نسيم المطر
قال البرئ منوتش اني ابوح
ولا كان في بالي
حصا من الارض يسمعني
ناح الحمام بدل النواح نوحتين
قال يا ضعيف القلب
واخدك هواك علي فين
إن شوفت العجب من الزمن
اسمع وما تسالش
حتي إن سمعت أن البارود
قرب يكون لو عنين

المرة دي
هطلق جناحي واغوص في رحم الارض
نرجع سوا ساعة الطوفان بالظبط
وانت اتبعني بس متبررش
وان مرة خوفت من الأبدية
أو عقلك غواك تبعد
انسي متفكرش
الكون أوسع من إضافة أسئلة بايخة
اصل الفضا انسان ولو سنان شايخة
شق بطن الارض ماجت بالصياح
العشب الاخضر اتبدلت روحة
اصبح شجر ملهوش أساس
والبحر هاج من كل جانب
والكون اصولة اتشقلبت واتلغبطت
ناح الحمام النوبة دي وطول في النواح
قال يا برئ الروح لسة التاريخ ما علمك
تجرد الاشياء
وتبدي روحك عالطبيعة المظلمة
هتف الحمام
ادم وطبعة الخطأ
واملة في الغفران
طبعة ضعيف القلب
حتماً هذا الفراق

صرخ البرئ
انا ما حلمت اني اكون سفينة نوح
أو اني اطير واملي السما بالبوح
انا عمري ما قررت اشوف الكون
من زاوية اني رسول
انا عمري ما حبيت اخد الا مساحة
نفر من الكون
يشبع سعات الصبح بدقات الندي
فوق رمش الورق
يغرس ايدين الورد في ايد حبيتة
تمسح جبينة من العرق
يدفي وسط الطيبين من برد القسا
انا ما حلمت في يوم اني اعرف
التأويل
انا بس ما حبتش جناحي يطير
معرفش رايح فين
وقبلت اكون صابر لكني مش قابل
اهدم في اي جميل
انتوا جميعا خضر مش علي حق
وانا الي موسي صواب
وعمري ما ابقي ذليل