يابلادي
كلمات: طارق المصري
يابلادي شدي الحيل
لو الف ليل على ليل
بكرة النهار راجع
والمجد ليكي سبيل
يابلادي صبر جميل
لأنين الهرم والنيل
رب العباد سامع
قادر يحيي كل أصيل
وخد قلبك الوردي
يفتح من تاني يابلدي
يابلدي أنا قلبي لروحك وطن
يقتلني في عينيكي الشجن
والبسمة لو تترسم على شفايفك
فيها حياة قلبي وكله من فضلك
يا نجومي في توهتي
وشراعي في غربتي
أنا ليكي الأب لو طفلة
بتحبي محتاجة لحناني
يا أمي وكل أوطاني
عيوني بالنور كافرة
لو تغيب شمس الحياة
عن جبينك
وتشرق من مكان تاني
ياما كنتي لينا بر
سكر في عز المر
ياصابرة على الهم
وإحنا السبب فيه
ياما كنتي لينا ممر
في الشدة بينا تمر
سفينتك في قلب اليم
وقلبك الطيب ياما رسينا عليه
بهمومنا ووجعنا وقلبنا اللي واجعنا
ياما حاجيتي عليه
اظن جه اليوم إننا نتلم
نحاجي على روحك
ونداوي في جروحك
ونبوسك ايديكي يام
نتحد لمجدك
ونقتل الفتنة
نبوس ايدين قلبك
ونعلن الفكرة
دلوقتي مش من بكرة
كلنا ليكي وطن
كلنا ليكي وطن
وإن كان صابك لتوهتنا شجن
يابلادي شدي الحيل
لو الف ليل على ليل
بكرة النهار راجع
والمجد ليكي سبيل
