سكة حديد

كلمات: أسماء كامل

قطر معدّي فـ سكّة حديد
جاي جايب الموت من بعيد
وناس واقفة بكل أمان
مش عارفة مصيرها الأكيد

***
غلابة ومنتظرين القطر
شاربين طول عمرهم المُر
تايهين بيفكّروا في حياتهم
مفيش فـ قلوبهم ذرة شر

***
دي ناس بتفكر بس فـ يومها
ودي ناس بتبني فـ مستقبلها
ودي ناس شقيانة ليل ونهار
بيقولوا يارب علينا هونها

***
عدّى قطر الموت وقتها !!
وفـ لحظة !! كل شئ انتهى
خلّصهم من أوجاعهم
بأوجاع والآم أصعب منّها

***
دول ناس غلابة ومقهورين
جنب الحيط كانوا متداريين
ولظروفهم كانوا مستسلمين
كان كل طموحهم عيشة كريمة
ولمّا ماتوا .. ماتوا محروقين

***
يامصر ياللي عايشين في حماكِ
ريحة الموت مغطية سماكِ
هو انتي كارهة ولادك ليه
دول كانوا بيحلموا برضاكِ