رحّال
شعر ياسمين الشاذلي
شد الرحال من حلم هالك
قيمتك في ذاتك مش في ليل حالِك
مِفَكَرُه يسندك جرّك في أوحالك
أنا شاهدة من يومها وحالي من حالك
جَلَدَك وحَوَّجك دَهْوَر أحوالك
الرب حارسك لسة مد ايديك
من حُبه فيك بروحي أوحالك
شد الرحال
دي عيون سماها مغيمة
الصحرا فيها ملغَّمة
مفيهاش أمان ولا مرحمة
تركد يمين ممكن في لحظة تدمرك
تمشي شمال التوهة دي تستدرجك
قلبك معلَّق في الحبال
أوعاك تشد
خطافها في أعلى الجبال
من قوة اللي فيك
تقع عليك تنهيك
مش فارقة ولا تكنيك
ارحل وفارق من هنا
في كل رحلة تروحها
روحها تِطْلَعَك
تنصت لصمت عيونها
بوحها يِطلِعَك
على المخبي بين ضلوعها
واللي كاشفاه روحها فيك
خوفك وهمَّك مصطفيك
تقيل وتقله يِضلِعَك
ارجع لنا ..
في لسة حاجة تطمَّعك
اسمع لأنغام الجبل ياحزين
الريح بتعزفله وهو بيدندن
ترد نجوم دهب ياليل
تضوي ياعين والقلب يطّمن
وحدي غرقت لوحدي في المشهد
وحدي سافرتك وانت لم تشهد
قلبي اغترب واعترف معاك بقيت اضعف
قلبي اللي عرفك واحتواك باللين
مالاقاش في يمّك غير مواني أنين
كل اما يوصل شط فيك يرتاح
يتفاجيء ان شواطئك كلهم قاسيين
مالاقاش في بحرك مركبة توَّصَل
مالاقاش في روحك وردتين طارحين
يا امتى امتى يرجع الفايتين
كل اللي هجروك السبب في النزف دا
كل اما بسمع غنوة لك مسكين
مفيهاش أمان ولا عزوة جوا العزف دا
غيّرت لحنك في بلد تانية
لا غَنَاك ولا غِنَاك هنَّاك
ولا اتملت عينك..
لا ارتحت يوم وفرحت
ولا سَدِّدت دينك
افراح هناك مش لك
شكلك هنا أصدق
لا الغربة لايقة عليك
ولا الغريب طبعك
الفرحة تشبهلي
والوحدة تشبهلك
اشبك في طرفي قبل ماتهلك
اشبك صوابعك في صوابعي أمان
تطرح ايدينا تاني زي زمان
حَبَك..زتون أو تين
ضلل عليا يزَّهر الياسمين.
