أميرة الديب رسامة تطمح للعالمية
أميرة منير الديب، ابنة المنصورة، موهبة متميزة في عالم الرسم، منذ نعومة أظافرها وهي تعشق هذا الفن، وواجهت من أجله العديد من الصعوبات.
قالت أميرة: "من صغري وأنا بحب الرسم وكان نفسي أدرس فنون جميله بس مقدرتش أعمل ده.. بس بسعى إني اتعلم كل المجال بس كبرت وفهمت إني لازم أوصل لحلمي مهما كانت المخاطر والصعوبات اللي هتقابلني".
وأضافت ابنة المنصورة: " بدأت آخد ركن بعيد لوحدي واحاول اشوف قدرتي على الرسم وصلت لايه؟ لقيت إن فكرتي للرسم كل يوم بتزيد عن اليوم اللي قبله وقفت مع نفسي وقولت لازم حلمي اللي بتمناه يكمل واقدر أكون قدمت ولو رسالة واحده في حياتي وكنت بتمناها".
تابعت أميرة: "بالفعل عملت ده أخدت الطريق من أوله من 10 شهور بالظبط أخدت كورس في أكاديمية وبدأت من الصفر وبدأت أدرس وأفهم كويس ودرست مع حد مشهور جدا اتعلمت تحت إيده محستش انه يقدر يعطيني الهدف اللي نفسي أوصله كويس بدأت أشتغل على نفسي كويس وبالفعل اشتهرت والناس بقت عرفاني لدرجه إني بمشي بره يوقفوني يقولولي إنتي الرسامه أميره الديب ووصلت لمرحله إني بعطي كورسات رسم".
وأكملت: "واشتغلت وبقيت برسم كويس الحمد لله وكلموني في الراديو، وعملت كذا مرة لقاء معاهم وبقيت فخورة بنفسي جدا إني قدرت أوصل لحاجه زي دي، وبرده لسه بكمل مشواري وباخد دبلومة كاملة في الرسم دلوقتي وإن شاء الله شايفة حياتي بعد فترة بسيطة كويسة جدا وهفتح جاليري كبير وساعتها أكون حققت رسالتي في الحياة وأقدر أواجه أي حد وقف قدامي وكان بيحاول يهدني ويحسسني إني عمري ما هبقي حاجة بقيت بحارب نفسي إني أوصل لمستوى أحسن وأكون حد مشهور والكل يتكلم عني عشان اثبتلهم أنا بقيت ايه وده بعد فضل ربنا الحمد لله".
وواصلت: "حضرت إيفينت كان موجود فيه الرسام الهندي القدير Vijay، وقدرت اكتسب منه خبرات كتيره جدا في المجال ولحد دلوقتي وهو بيتواصل معايا وقدر يخرج الطاقة الإيجابيه اللي جوايا، وحضرت معرضين والحمد لله واحد في المنصورة والتاني في قاعه الفنون بجريدة الأهرام ودلوقتي بحضر لسفري لروما لعرض معرض كبير جدا بس بعد فرحي عشان فرحي كمان شهر، وهكون أنا منظمة المعرض ده هيكون فيه فنانين عباقرة وكل الأساتذه من كل أنحاء العالم بإذن الله والفضل ده كلو يرجع لخطيبي وشريك عمري المحامي سامح عبد العال، هو السبب بعد ربنا في كل اللي وصلت ليه ده لولاه ولولا مساعدته ليه ووقفته جمبي هو وأهلي اللي مقدرش أنسى وقفتهم جمبي مكنتش بقيت حد متفائل وحابب مجاله كده".
ينشر باب المواهب مجموعة من الأعمال المتميزة للفنانة أميرة الديب بينها صورة للنجم الدولي محمد صلاح نجم ليفربول الإنجليزي بالعسل والشاي.
