حكاية " شرير" الإسكندرية.. الشقي خطر على الأمن العام
القصة بدأت ب " سيجارة حشيش " وانتهت ب " ٢٧ سنه " احكام
الشراني : اول قضية وانا ابن ١٢سنه وكنت " معلم" " الخناقات" و " السلاح الابيض" لا يفارقني
تبت في " قفص المحكمة " والسبب "منام " و مسجل قديم جالي من جهنم
عطية: الحياة خدعة وغرورة ولو يرجع بيا الزمن همشي جنب الحيط
درس الحياه الصبر على الابتلاء و حياتي عظة للأشقياء والمسجلين
مابين ماض حمل أحداثا مهولة لفصول قصة ل "مسجل شقي خطر" ذاع صيت جرائمه ليؤرق منطقته حيث ترعرع بالأسكندريه وبات الصغير قبل الكبير يتابع اخباره وصولا الى القبض عليه عدة مرات ليقبع في السجن بمجمل احكام وصلت ل٢٧ عاما و بين حاضر قريب حمل صاحب هذا الحوار فيه لقب " تائب" فبعد ان كان مسجلا خطرا وارق الامن واصبح صداعا في رأسه لفترة طويله بعد ان بات يتخذ من "عراك الشوارع" منهجا له ولايفارقه السلاح الابيض الذي تسبب للاسف في هذه" العركات" مثلما يطلق عليها" السكندرية"في سقوط ضحايا واصابات .. الا انه قرر ان يغير مصيره تماما في لحظة فارقة كان فيها صادقا مع نفسه ربما رأى فيها الحياة على حقيقتها ..
اتخذ" عطية" قراره بأن يتبدل الحال والايصل لان يلاقي مصير نظراء له مضوا في طريق الشيطان للنهايه ... فصول القصه تبدأ منذ ولادته في اسرة مكونه من اب وام لديهم اكثر من ١٠ اطفال وحتى اخر " زنزانه" الذي رأى فيها منامه الغامض وقرر ان يتوب توبه " نصوحه" ويتحول من " عطية الشراني" ل " عطية التايب" .. وكان معنا هذا الحوار
- اسمك ايه؟
- عطيه رجب عطيه
- والشهرة؟
- الشراني .. من الشر يعني
- ودلوقتي؟
- لا الحمد لله " التايب"
- عندك كام سنه؟
- ٥٢سنه
سألناه بدهشه - ٥٢ سنه .. يعني قضيت نصف حياتك بالسجن؟!
-للاسف ايوا
-حكايتك بدات مع الحبس ازاي .. ايه اول قضيه اتقبض عليك فيها؟
-كان عندي ١٢ سنه واتمسكت ببيع مخدرات
- بتبيع ولا بتتعاطى؟!
- الاتنين بس اتمسكت ببيع
- سنك كان صغير جدا .. ازاي اتعاطيت الاول؟
- كنت اصغر اخواتي لأم معاها اكتر من ١١ طفل ومرميين في الشارع وعلى سن عشر سنوات علموني اصحاب السوء شرب السجاير وبعد كده الحشيش وبقيت ببيع ب". يوميتي"
- وكانت كام وقتها؟
- ٢٥جنيه في اليوم وكانت اكبر من يوميه راجل مكنتش الحكومه بتشك فيا وكنت بوصل وابيع بسرعه لحد لما اتقبض عليا
- وبعدين؟
- خرجت وكملت في نفس الطريق بس كبرت واتعلمت امسك سلاح ابيض وبقيت استاذ و معلم في " العراك" او " المشاجرات" زي مابتسموها وبعرف اعور واعمل عاهه من غير ماللي قدامي يموت
- ودخلت السجن كام مره؟
- كتير مبقتش اعدهم بس وصلت مجمل احكامي ٢٧ سنه
- انت متجوز ؟
- اه وعندي بنات على وش جواز
- وكنت مسجل شقي خطر؟
- اه فئه " ا" واتسجلت جرائم نفس ومخدرات
- اتعلمت ايه من السجن؟
- اتعلمت في اخر ايامي الصبر وانه خلاني افكر في حياتي كلها واللي عملته وان مفيش حاجه تستاهل ضياع ٢٧ سنه خلف القضبان واتعلمت صنعه اعمل شويه " خشب" واحسن حاجه اني بطلت فيها تعاطي تماما بعد ماقررت اني ابطل
- وبطلت ليه ... يعني امتى قررت؟
- اخر مره اتحبست كنت ببيع وبتعاطى وبنتي الصغيرة لقيتها بتعيط وبتقول " كفايه هتموت يابا" ومن وقتها بطلت
- وقصة التوبة جت ازاي؟
- جت وانا في المحكمه نمت وانا مستني القضية بتاعتي جاتلي رؤيه ان لو ماصلحتش من حالى هحصل واحد مسجل خطر كنت اعرفه ومات موته بشعة ومحدش مشي في جنازته ولا حد اترحم عليه وقتها قمت واستنيت حكم القاضي وقلت يارب لو مطلعش حكم كبير هخرج واتوب وكانت ابواب السما مفتوحه واتحكم ب ٣ سنين ورجعت الزنزانه عشان انام وتجيلي نفس الرؤيه بس اوضح فقمت اصرخ تايب يارب والتوبه نصوحه ومن وقتها ولا ببيع ولا بشرب ولا بمسك اي سلاح
- بقالك قد ايه ؟
- بقالي خمس سنين
- عايش ازاي؟
- فتحت كشك صغير ببيع فيه شويه حاجات
- ايه اللي اتعلمته من الحياه؟
- الصبر مفيش احلى منه ، الصبر على ابتلاء ربنا لانه ربنا بس اللي عنده الفرج ولان الانسان ممكن يضيع نفسه بافعاله لو مصبرش ، وان الحياه قصيره والحياة غرورة مجرد كذبه وخدعه وكلنا هنموت ومش باقي الا الخير
- ايه امنياتك في الحياه؟
- امنيتي استر بناتي واعرف اجهزهم واعمل عمره
- بتنصح الشباب اللي ضل طريقه بإيه؟
- اقوله شوفني واللي زيي وصلنا لإيه ولا حاجة .. كبرنا وعجزنا والحياة هدتنا وضيعنا احلى ايامنا في السجن .. اتعظ وامشي عدل يحتار عدوك فيك
