ياسمين عز تهاجم منتقدي أحمد حلمي

هاجمت الإعلامية ياسمين عز منتقدي النجم أحمد حلمي عن دوره في فيلم النونو الذي تم الإعلان عنه مؤخرا واصفة إياهم بأنهم قلة مندسة تتعمد تشويه الفنانين.

قالت ياسمين عز خلال برنامجها كلام الناس: النجم أحمد حلمي يتعرض لهجوم غير مبرر من مجموعة أقدر أقول عليهم قلة مندسة .. والقصة بدأت لما تم الإعلان إن أحمد حلمي هيعمل فيلم اسمه النونو .. ضمن مشروعات هيئة الترفيه والمفروض يقدم فيه دور نصاب.

تابعت: الدور ده إتعمل عندنا في مليون فيلم ومسلسل، لكن القلة المندسة قوموا الدنيا وقالوا فنان مصري هيعمل دور يسيء لنا .. تعالى نرجع بالزمن لورا .. مش أحمد حلمي عمل فيلم كده رضا وكنا مبسوطين بيه وكان طالع في دور 3 نصابين توائم وعمل قبل كده فيلم عسل إسود ودوره فيه إنه لما وصل مصر شاف سلبيات ونصب وفهلوة .. ساعتها كلنا سقفنا لأحمد حملي وأشدنا بالفيلم لأن مصر العظيمة أكبر من إن أي حاجة تسيء لها.

أضافت: أحمد حلمي احترمنا وقدم لنا أفلام محترمة فيها رسالة وضحك وتصلح للأسرة جميعا وغير خادشة للحياء .. فجأة بقى بيسيء لمصر ولازم يحاكم بتهمة الخيانة العظمى؟ إيه الازدواجية والتناقض ده.