ماذا قال شريف بدر الدين لزوجته قبل رحيله ؟
تحدث السيناريست شريف بدر الدين عن زوجته الراحلة قبل وفاته قائلًا: لما حصل اللي حصل من 5 سنين سألته عن السبب وما لقيتش رد، أي حد في مكاني طبيعي إنه يهدى، بس ده ما كانش هذيان.. ده كان سؤال بجد إيه الغلط اللي عملته علشان يبقى ده عقابي، وليه لو بتعاقب على حاجة مش عارفها البنات يتعاقبوا معايا؟، ما كنتش قادر أفهم أي شيء غير إني فشلت، فشلت إني أرجعك وأحافظ عليكي، كل يوم وأنا خارج كنت بقفل الباب ورايا، واشِدُّه كويس علشان اتأكد إنكوا في أمان، كنت بانزل مستعد لأي خناقة، وعارف إني مهما اتعورت هرجعلكوا آخر اليوم، أطهَّر أي جرح لما عيني تشوفكوا، واتأكِّد إني كسبت لإنكوا في أمان.
وأضاف شريف بدر الدين: لما صابعي اتكسر من تلات سنين اضطريت أقلع الخاتم اللي عليه اسم ليلى ولبنى، بعد العملية اتفاجئت بالدكتور بيقولي إني مش هقدر البسه تاني، وفهِّمْني إن الكسر لما بيلئم بتزيد كثافة العضم، ومقاس الصباع بيتغيَّر، اتغاظت إنه ما قالش المعلومة قبل العملية، جايز لو كان قالها ما كنتش عملتها، على الأقل ما كنتش هدي فرصة للقدر إنه يتآمر عليَّ، ويحسسني تاني إني فشلت، وما قدرتش حتى احافظ على أساميهم في صباعي.
برسالة مؤثرة، ودع السيناريست وائل حمدي صديقه الكاتب والسيناريست شريف بدر الدين الذي توفي فجأة صباح الأربعاء 17 يوليو الجاري عن عمر يناهز 45 عاما.
تفاصيل الخبر
كتب وائل حمدي عبر حسابه بموقع X: "هو مافيش كلام يتقال قوي يعني.. شريف بدرالدين الله يرحمه! امبارح الساعة اتناشر بالليل بعتله ميم عن المسلسل، ونمت.. صحيت لاقيته رادد عليا بضحكة الساعة اتنين بالليل.. وع الواتس اب برضه لاقيت حد باعتلي بيسال (هو شريف مات بجد؟!) فطبعا انا استرجعت كل اللي اعرفهم واسمهم شريف، إلا شريف بدرالدين!".
وتابع: اتنين وعشرين سنة! لما باتفرج على حاجة كاتبينها سوا، عمري ما باميز مين اللي اقترح الجملة دي او مين اللي فكر ف التفصيلة دي! باعرف أميز ف اوقات كتير على فكرة مع كتاب اصدقاء تانيين، بس مع شريف خلاص بقينا بنفكر زي بعض ف اغلب الحاجات!
وأضاف وائل حمدي: ربنا يرحمه، ويصبر مامته واخواته وبناته.. ادعوا لبناته.. الكبار عندهم اتناشر سنة والصغيرة ست سنين، اتولدت قبل وفاة مامتهم بشهر! طب يعني ايه الوضع ده؟! الحمدلله اللهم لا اعتراض!
وكتب وائل حمدي عن مسلسل "مفترق طرق": "المسلسل اللي بيتعرض دلوقت كتبنا الپايلوت بتاعته من ست سنين! وخلصنا شغل فيه من تلات سنين ونص، ولما اتاخر قوي ف التنفيذ وبعدين ف العرض كنت مسقطه من حساباتي تماما وشريف اللي كان متلهف لعرضه دايما وعنده يقين انه الناس هاتحبه قوي.. وفعلا لما اتعرض نجح والناس حبته وشريف فرح بالنجاح، وقاللي "مش قلتلك؟!".. قالها كذا مرة ف آخر كام مكالمة.. الحمدلله اللهم لا اعتراض!"
واستكمل: كنت لسه بافكر قريب ان ربنا من عليّ بنعم كتير قوي السنة دي، ونجاحات ورا بعض، وباحمده، بس طبعا لازم يبقى فيه قلم كده والا الدنيا ماتبقاش دنيا.. الحمدلله اللهم لا اعتراض!
واختتم حديثه قائلًا: شريف اصغر مني بخمس سنين.. وعمره ما اشتكى من حاجة يعني.. اقصد صحيا، بس قلق الفجر صدره بيوجعه ووقع.. بس كده.. الحمدلله اللهم لا اعتراض!.
وتصدر السيناريست شريف بدر الدين التريند على جوجل، وذلك بعد رحيله عن عالمنا عن عمر ناهز 45 عامًا.
حزن على رحيل زوجته حتى لحق بها بعد 6 سنوات
وكان شريف بدر الدين مرتبط بزوجته كثيرا وعائلته، حيث رحلت زوجته في 27 سبتمبر 2018 بعد أزمة مرضية وحاول شريف تجاوز وفاة زوجته دينا ولكنه كان يحرص على الكتابة لها يوميا عبر حسابه على فيس بوك كأنها مازالت متواجدة معهم وينشر صور من مناسبات عائلية لهما ومع بناته، حتى رحل عن عالمنا اليوم بعد 6 سنوات على وفاة زوجته.
وشيع أهالي مدينة زفتى بمحافظة الغربية، جثمان السيناريست شريف بدر الدين الذي توفي اليوم عن عمر يناهز 45 عاما.
وتقدم الجنازة الفنان أحمد بدر الدين شقيق الراحل وسط حالة حزن على فراقه.
من هو شريف بدر الدين ؟
وُلد الكاتب الراحل شريف بدر الدين في الغربية عام 1979، حصل على درجة البكالوريوس في المحاسبة من كلية التجارة عام 2001، وفي 2006 حصل على درجة البكالوريوس في السيناريو من المعهد العالي للسينما.
شارك في كتابة وتأليف عدد كبير من المسلسلات مثل:"عالم سمسم في 2002، وتامر وشوقية في 2006، وبسنت ودياسطي في 2008، والعيادة في 2008، والجامعة في 2011، وأبواب الخوف في 2011، ولسة بدري في 2012، والباب في الباب الجزء الثاني عام 2012، وهبة رجل الغراب في 2014".
