أبو الوفا: اتحاد الكرة جزء من الشعب المصري وعقد حسام حسن حتي 2026
تحدث محمد أبو الوفا عضو مجلس إدارة اتحاد الكرة عن رحيل روي فيتوريا عن الفراعنة وتعيين حسام حسن.
وقال محمد أبو الوفا في تصريحاته: اتحاد الكرة جزء من الشعب المصري والحمل الذي علينا أكثر من الحمل الذي يحمله أي شخص، ونريد دائما منتخبنا أفضل.
وحول قرار تعيين روي فيتوريا وهل كان بالإجماع؟، قال أبو الوفا: مفيش حاجة اسمها حازم إمام أصر بمفرده على تعيين روي فيتوريا، مفيش حاجة اسمها كدة، حازم عرض مجموعة من السير الذاتية وصلت إلى 10 مدربين وفاضلنا بينهم حتى وصلوا إلى روي فيتوريا.
وعن راتب فيتوريا قال عضو اتحاد الكرة: الزملاء اللي كانوا بيتفاوضوا معاه في الفلوس عملوا اللي عليهم بزيادة ومعتقدش إنهم كان في إمكانهم تقليل الراتب 5 آلاف يورو ولم يفعلوا ذلك.. ولما بيتم وضعك في الاختيار على أساس بعض المعطيات بضحي مرة شوية واللي ايده في الماية مش زي اللي ايده في النار.
وعن الشرط الجزائي قال: كان في جلسة مع وليد العطار عشان يتكلم معاه في الشرط الجزائي وفيتوريا قال الكلام مع المحامي الخاص بي وهو هيمشي الأمور في نصابها القانوني وحق اتحاد الكرة مش هنفرط فيه.. فيتوريا ياخد الفلوس اللي ليه مش أكتر.
واستكمل أبو الوفا: ليه حازم إمام ميبقاش مشرف على المنتخب زي ما هو.. ولازم يبقى حلقة الوصل بين المنتخب ومجلس الإدارة مش بيخطط للمنتخب الأول يعني لكن هو حلقة وصل، والكلام ده ينطبق على حازم وعلى محمد بركات بحكم انهم لعبوا كورة، ومعنديش المعلومة والله لو عندي كنت قولتها.
وحول مدة استمرار حسام حسن، قال: نخلص بس التحديات اللي عندنا وإن شاء الله يستمر ويكون موجود معانا، والعقد المفروض لغاية كأس العالم2026.
وواصل أبو الوفا: اتحاد الكرة يقدر قيمة محمد صلاح كويس جدا، والأصلح لمنتخب مصر ولمحمد صلاح، اتعمل ومليش دعوة يورجن كلوب قال ايه، الإعلام هو اللي عمل البلبلة.
وأكمل عضو اتحاد الكرة: الشناوي سافر زي محمد صلاح ومحدش علق عليه زي ما علقوا على صلاح.
واختتم أبو الوفا: منتخب الشاطئية يستعد لمباريات كأس العالم، وإن شاء الله قادرين على النجاح رغم قوة الفرق المتواجدة معنا في المجموعة الأولى.
