منى زكي: " مكنتش متخيلة تصنيف فيلم رحلة 404 +18"

تحدثت الفنانة منى زكي عن فيلم "رحلة 404، الذي يعرض حاليا في دور عرض السينمات، مؤكدة أن العديد من المنتجين رفضوا هذا الفيلم بسبب إنه غير جماهيري.

وقالت منى زكي خلال لقائها مع الإعلامي عمرو أديب ببرنامج الحكاية: هاني خليفة جابلي الورق في 2011 وكل ما نقرر نعمله المنتجين كانوا بيقولوا ده مش فيلم جماهيري، ومش هيعجب الناس، فنعمل مشاريع تانية ونرجع تاني ندور على منتجين، وتقريبا لفينا على كل المنتجين، والرد كان إنه مش هيعجب الناس، وفي الآخر محمد حفظي هو اللي تحمس للفيلم عشان يطلع.

وأوضحت منى زكي: الفيلم متصنف للكبار فقط ومكنتش متخيلة إنه هيتصنف +18 يعني قولت ممكن 16+، ومن أول يوم وأنا حباه ومش شايفة إنه فيه حاجة وحشة، بالعكس حابة الفلسفة اللي وراه، وبعد ما صورنا شوية من الفيلم بدأت أفهم إزاي الناس ممكن تطلعك على المسرح فقلقت شوية.

وأضافت منى زكي: بس أكتر حاجة طمنتني هو وجود أستاذ هاني خليفة، وعمرك ما هيجيلك إحساس إنك تقرف من شخصية غادة، ولازم نفهم إن إحنا مش ربنا، وكل البني أدمين بتغلط وليهم أخطاء حسب نسبة الخطأ.