بيان رسمى من محمد شريف بعد الرحيل عن الاهلى

اصدر محمد شريف نجم النادى الأهلى بيانا رسميا بعد الاعلان عن رحيله رسميا الى نادى الخليج السعودى.

وكتب محمد شريف عبر صفحته الرسمية على الفيس بوك:
السلام عليكم ورحمة الله وبركاته
في البدايه مين يكون معاه وفي ظهره النادي الاهلي ويقدر يتشرط او يملي شروطه عليه انا بكتب البوست ده حابب اوجه الشكر لكل ماهو ينتمي للكيان الكبير وبيتي النادي الاهلي

اولا الجمهور
وواصل محمد شريف: انا فعلا مش لاقي كلام يوصف ولا يوفي حقكم عليا بعد ربنا سبحانه وتعالي كنتم انتم خير دعم ليا وخير سند في اوقات صعبه ليا وللفريق ككل بشكركم . وبعتذر عن اي تقصير في يوم حصل مني وهتفضل اصواتكم ديما معايا وجوايا يااعظم جمهور في العالم جمهور الاهلي هو من يصنع النجوم دمتم نعمه

ثانيا:
وأكد محمد شريف: اشكر ادارة النادي الاهلي انها ساعدتني وادتني الفرصه ان اخر ج من الباب الكبير ومن خلالهم وتحت اشرافهم هما ، اول مااتعرض عليا العروض كنت حريص علي توجيهها للاداره لدراستها قبلي انا شخصيا وكمان لحفظ حقوق الكيان نفسه قبلي انا شخصيااااااا وتحقيق اكبر افاده للكيان.

وبقولها واكد عليها:
وأردف محمد شريف: لاعاش ولا كان اللي يجي الاهلي ويتشرط عليه في تجديد ولا غيره انا خارج من باب الاهلي الكبير ولله الحمد حاولت افيد النادي علي اد مااقدر وده ميجيش جزء من فضل النادي عليا شخصيا وده شي يشرفني، وديما يكفيني ويكفي اولادي ان اسمي موجود في سجلات النادي وهذا من فضل الله عليا

ثالثا :
وقال محمد شريف: اشكر كل من زمالتهم وكانو سند ليا وقت لعبي بالفريق من لاعبين كانو اخواتي وديما في ظهر بعض وبفضل الله وبفضلهم عرفت احفر واسجل ارقام هتفضلي موجوده باسمي داخل سطور الكيان الكبير

واوضح محمد شريف: بشكر كل المدربين والاداريين اللي اشتغلت معاهم من اصغر واحد لاكبر واحد واخواتنا العمال اللي تعبو معايا جدااا طوال الفتره والفريق الطبي كله بلا استثناء

اخيرا وجب التوضيح
واختتم محمد شريف: عشت جوه النادي الاهلي ٦ سنين من عمري واجب عليا والتزاما مني اتجاه النادي اخرج وانا شخص مسئول ولذلك انا من طلبت من النادي الاهلي اخذ كل الاحتياطات لضمان حقوق عودتي من جديد لدوري المصري من خلاله فقط او العرض عليه اولا قبل العوده لمصر

واي كلام يقال في الموضوع ده لا يمت للحقيقه باي شي وهذا للعلم فقط الاهلي مفيش حد يتشرط عليه للتاكيد ولكل اللي متابعني طول سنيني ال٦ بالاهلي لم افتعل ولو مشكله واحده وهذا من فضل الله عليا ، لاني اتعامل مع منظومه اعرف واجباتي اتجاها بكل تفصيله ولنا عوده

وأعلن الكابتن خالد بيبو، مدير الكرة بالنادي الاهلى، عن الموافقة على بيع اللاعب محمد شريف إلى نادي الخليج السعودي. جاء ذلك بعد الرجوع إلى مارسيل كولر، للحفاظ على احتياجات الفريق الفنية.