رامي جمال: الست اتخلقت عندها الغريزة رقم 1 الأمومة

كشف المطرب والملحن رامي جمال عن عائق طبي يمنعه من تحقيق حلم الإنجاب وقال إنه يعتبر أبناء شقيقه بمثابة أولاده.

قال رامي جمال خلال لقائه ببرنامج حبر سري الذي تقدمه الإعلامية أسما إبراهيم: إرادة ربنا ما بتتعاندش .. وعرفت إني عندي مشكلة في الإنجاب .. ونفسي يكون عندي ابن يحمل اسمي .. بس من نعم ربنا إنه بيراضيني بكل حاجة .. وباشوف ولاد أحمد أخويا ولادي وولاد أي حد أعرفه من قلبي ولادي.

وتابع: سبحان الله ما بقيتش أفكر في موضوع الإنجاب كنت اللي بخاف عليه مراتي ناريمان وخفت تكون مؤذية من الحتة دي وقلت لها في مرة احنا بنعيش مرة واحدة مفيش وقت تعملي جدعة وتضيعي على نفسك حلم الأمومة الراجل ممكن يعيش عادي الست اتخلقت عندها الغريزة رقم 1 الأمومة عمري ما هشوفك قليلة الأصل لو مشيتي بس هي زيي قالت لي كل أنواع الرزق بتيجي لكل شخص لوحده إلا الخلفة .. دا رزق مربوط لاتنين ولو مكتوب لي أخلف منك هخلف منك ولو مكتوب لي هيبقى منك ولو مش مكتوب لي مش هسيبك لإني ممكن اتجوز من شخص تاني وما خلفش فساعتها هبقى خسرت البني آدم اللي بحبه.