النجمة اللبنانية "نور".. تعود بأدوار كوميدية
بعد غياب سنوات طويلة
قالت لـ"الجمهورية أون لاين"
انتظرونى فى 3 أعمال مع هنيدى وكريم والكدوانى
قالت النجمة اللبنانية نور أن عام 2023 كان وشه حلو عليها واعادها إلي الاداء الكوميدي بعد سنوات من الابتعاد واضافت "عملت أدوار غيرت مودي ووقفت قدام مدارس مميزة في الكوميديا ".
وتقول الفنانة نور: اعتبر نفسي عملت هاتريك زي ما بيقولوا في كرة القدم لأني اشتركت في 3 أعمال مهمة من حيث الموضوع وفريق العمل.. البداية بفيلم "نبيل الجميل أخصائي تجميل"مع النجم الكبير محمد هنيدي وكانت فرصة حلوة جدا اني اعمل بطولة أمامه.. والفكرة كمان مهمة عن الهوس بعمليات التجميل بسبب وبدون سبب وكلنا شفنا نماذج كتيرة لعمليات تجميل اضرت بمن أجراها لانها كانت لمجرد الرغبة في تغيير الملامح دون مبرر..والفيلم انتهي بان دكتور نبيل اتفاجيء أن خطيبته دكتورة علياء أجرت عملية تجميل بوظت وشها يوم الفرح وكان درس عشان مش كل حاجة نجري نقلها..للي معاه فائض فلوس يحطه في شيء مفيد.
وتضيف: التجربة التانية سينمائيا فيلم "بيت الروبي " أمام النجم الجميل كريم عبدالعزيز.. والفيلم بشهادة الجمهور في مصر والعالم العربي والنقاد منسي الدنيا بنجاحه وتحقيق اعلي إيرادات في تاريخ السينما ودا مش كلامي طبعا..دا كلام النقاد والمهتمين بعالم السينما المصرية والعربية..واعتقد أن سر نجاحه الموضوع برضه لانه يناقش تأثير السوشيال ميديا في حياة الناس لدرجة انه ممكن يدمر مستقبل بني آدمين بدون ذنب..ودا اللي حصل لعيلة الروبي اللي ياخد زوجته وأولاده ويعيش بعيد عن القاهرة سنوات.
وتقول: الفكرة كانت حلوة والكوميديا كانت ممزوجة بالشجن والمواقف الاجتماعية المؤثرة.. يعني مش لمجرد الضحك.. انا كنت سعيدة بتجربتي مع فريق الفيلم كله والمخرج العبقري بيتر ميمي زي ماكنت مبسوطة بتجربة "نبيل الجميل اخصائي تجميل " مع أسرة الفيلم والمخرج خالد مرعي.
وتضيف نور اللبنانية: الفيديو برضه كان حظي حلو..عملت تجربتين مختلفتين. الجزء الثاني من مسلسل: موضوع عائلي "مع النجم ماجد الكدواني.والتجربة التانية كنت ضيفة شرف مع النجم احمد مكي في "الكبير أوي" في رمضان.. المسلسل ماشي في حتة لوحده تماما.. بدليل انه وصل للجزء السابع وناجح جدا وباذن الله يكمل..بصراحة كنت مفتقدة الموضوعات الكوميدية والسنة دي قدمت مجموعة شخصيات فرحانة بيها اوي.
واخيرا. عن ظهورها في الاعلانات تقول النجمة نور:
وماله..عمل فني قصير ومبهر والناس بتحب تشوفه طالما مش مستفز ولا بيعرض سلعة ضارة..كل النجوم جربوا حكاية الاعلانات ..من حقي انا كمان اجرب والحمد لله ان رد الفعل كان لطيف عند الجمهور.
