قبل البداية
طريق السعادة
د. هالة منصور .. استاذ علم الاجتماع
حد فيكم بيعرف يسافر للمستقبل؟ هتقوللي بنحلم. هتقوليلي بنخطط. هتقوللي بنتخيل. هتقوللي بنتوقع هقولكم حلو قوي وكل إللي قولتوه لازم يحصل بس مش هو ده السفر للمستقبل.. السفر للمستقبل دي مهارة مهمة جدا للعمل. للحياة. لكل حاجة. السفر للمستقبل إنك تفكر في النهاية قبل البداية. يعني اوعي تبدأ حاجة الا وعينك علي النهاية. ولو النهايات تستاهل خد قرارك.
لكن لو نسيب نفسنا للتلقائية هنخسر حتي لو علي مستوي الحوار هقول كلام هيزعل هيتفهم غلط أو يعمل مشكلة وارجع اعتذر عنه أو ابرره لو كنت سافرت للمستقبل كنت هسكت. افضفض بأسرار وارجع أخاف تتقال. واتمني نسيانها مانا كنت امسك لساني واسيطر علي انفعالي. لو كنت سافرت للمستقبل كنت اتحكمت في انفعالي وسيطرت علي لساني.
بمعني آخر خلي اغلب تصرفاتك مسببة مش تلقائية ولازم تربي دايما صوت جواك يسألك قبل التصرف هتعمل كده ليه؟ أول ما هنفكر ليه ونحاول نرد علي السؤال ساعتها هنسافر للمستقبل وربما نلغي بدايات كتير هتوصلنا لنهايات مش مرغوب فيها بمعني ثالث خلي تفكيرك يسبق تصرفك خطوة وساعتها هيقولك أتصرف أو أجل أو حتي بلاش لأن النهايات ما تستاهلش وفر مجهودك لبدايات نهاياتها أفضل.
شفتوا بقي إزاي المهارة دي مهمة قوي لأي تصرف مهما كان بسيط أو مهم عاوزين نقلل شوية المفقود من وقتنا وعمرنا وطاقتنا وامكانياتنا في السير في طرق بداياتها مغرية ولكن نهاياتها غير مطمئنة كل ده هيكون لو قدرنا ندرب نفسنا علي الحوار مع أنفسنا دايما قبل التصرف سواء بالفعل أو الكلام أو حتي الاحساس.
فكروا في النهاية قبل البداية علشان تبقي بدايتكوا صح ونهايتها أصح. سيطروا علي تلقائية الفعل أو حتي رد الفعل لحظة انتباه وتركيز هتوجه دايما السلوك بالتصرف أو التأجيل أو الإلغاء كله حسب الهدف لأنك لازم تكون محدد الهدف مهما كان مدي ذلك الهدف ده العمر لحظة والطاقة همة والسلوك مسئولية والسعادة قرار يعني في أي اختيارات سافر للمستقبل مع أي حسابات سافر للمستقبل مع كل التعاملات والمعاملات والعلاقات سافروا للمستقبل فدائما المقدمات تؤدي إلي النتائج. وللحديث بقية إن شاء الله.
