أجمل بداية لليوم
طريق السعادة
د. هالة منصور.. أستاذ علم الاجتماع
"أجمل صباح عندي صباحك الوردي. صباحك البسام" .. فعلاً احلي صباح في الدنيا لما ربنا يسعدنا بالناس اللي بنحبهم. الناس اللي بيقابلونا بابتسامة حلوة. بكلمة رقيقة. بنظرة امل. بنظرة محبة. بدعوة صادقة.
دائما البدايات في كل حاجة مهمة جداً. بداية اليوم بتفاؤل وحب بيمد الإنسان بطاقة إيجابية. ويعطيك طاقة للعمل والحياة والحب . ومهما كانت ظروفك او أحوالك طالما جه عليك يوم جديد لازم تحمد ربنا وتشكر فضله. طالما قادر تدوس علي رجلك وتتحرك لازم تتفاعل وتمشي وتجري وتتحرك في كل اتجاه. طالما قادر تتكلم وتحس وتعيش خلي كلامك حلو وحلي يومك بالأمل والتفاؤل والمحبة.
عيش الحياة بأمل ومحبة وتحد وثق بالرحمن وتأكد ان بكره نقدر نخليه احلي ان شاء الله. ده يوم جديد يعني صفحة جديدة. يعني فرصة جديدة. يعني امل متجدد. يعني نعمة من عند ربنا.
خلي بداية اليوم دايما بتفاؤل. شغل علي تليفونك غنوة حلوة بتحبها اول ما تصحي اسمعها وغني معاها ومافيش مانع كمان ترقص لو عايز» ابتسم لوجهك في المرايا وصبح علي نفسك بمحبة وتفاؤل مهما كانت الظروف.. دور علي الحلو اللي فيها وبص عليه. حب نفسك. دلعها. طبطب عليها. طمنها. اسمعها. أسعدها . دا العمر هنعيشه مرة واحدة ومش هنعيشه وبس لا دا احنا هنتحاسب عليه. خلي الحياة احلي بالأمل. بالأهل. بالأصحاب. بالزملاء.
خد من كل حاجة الحلو اللي فيها حتي المشكلة خليها تحدي والفشل خليه تجربة. والمحنة عديها بسرعة. والمحبة استمتع بيها. والفرحة عيشها بكل تفاصيلها. والضحكة امسك فيها ودور عليها. والأحباب اتسلح بيهم. والأمل خلية معاك مهما كانت الصعاب. والناس الصعبة شوفهم علي قدهم. خد منهم اللي يخصك وابعدهم عن ذاتك. اتعامل معاهم للضرورة وبس واوعي تسمح لهم يدخلوا جواك. قابلهم برا نفسك في شارع الحياة واجري علي حبايبك وافتح لهم قلبك.
جربوا كل يوم ندي نفسنا ولو ربع ساعة في الصبح نملأ فيه أنفسنا رضا. نبدأها بأغنية حلوة بنحبها ونسترجع اي شيء جميل او نفتكر ذكري حلوة وكأننا بنمون زي ما بنمون بنزين العربية زي ما بنغذي المعدة بالمشروبات والمأكولات نغذي النفس بالسعادة والمحبة والمرح والنكتة والضحكة واي حاجة تفرح وساعتها هنقدر نواجه ضغوط اليوم في الشغل أو الحياة بقوة وأمل وسعادة. وللحديث بقية إن شاء الله.
