مهازل التسريب والغش في الإعدادية تثير القلق في نفوس طلاب الثانوية

تسببت المهازل التي شهدتها امتحانات الشهادة الاعدادية في اغلب المحافظات في اصابة طلاب الثانوية العامة وذويهم ومعلميهم بحالة من الانهيار العصبي والقلق والتوتر وهم يضعون اياديهم فوق قلوبهم خشية تكرار تلك المهازل اثناء عقد امتحانات الثانوية العامة .. وبعدما كان الهدوء يسيطر عليهم حتي ايام قليلة مضت بدأت كل الاطراف تعلن خوفها وقلقها المشروعين تماما.

الجمهورية اونلاين فتحت حوارا مع كل الاطراف قبيل حوالي ٣ اسابيع فقط من انطلاق امتحانات الثانوية العامة .. لنعرف ماذا يريد الطلاب واولياء الامور والمعلمون .. من الوزارة في الفترة المقبلة وماهي اهم مطالبهم التي يتطلعون لتوصيلها للقائمين علي الامر.

قالت والدة الطالبة سارة عادل .. كل طلبي القضاء علي الغش في الارياف خصوصا الثانوية العامة اقسمت ان هناك لجانا كاملة يدخل طلابها وطالباتها الطب والهندسة وهم لايرقي مستواهم لمعهد فني متوسط, تمنت ان يكون هناك حسما في هذا الامر مؤكدة انها.

ترجو مي عرابي ولية امر من الوزير رضا حجازي الاهتمام بعملية التصحيح بدقة وتلافي الأخطاء التي ادت الي ضياع حقوق كثير من الطلاب في العامين الاخيرين مع مراعاة تنوع وتدرج مستويات الصعوبة في الاسئلة بحيث تناسب جميع فئات ومستويات الطلبة وان تكون الأسئلة الإبداعية في أضيق الحدود لتحقق الغرض منها في فرز الطلاب المتفوقين فقط.

اما الهام عيد والدة الطالب عمر عادل فقالت ياريت تكون الاختيارات من متعدد غير متشابهة ويكون لها إجابة واحدة يتفق عليها لأن المدرسين لهم إجابة والتصحيح له إجابة اخري خالص.

اكدت رانده عبد العزيز والدة طالب بعلمي رياضه انها سمعت ان اللجان ممنوع فيها المراوح فهل هذا يرضي احدا ..موضحة ان الامتحانات هتدخل في شهر يولية الجو حار جدا، واشارت الي اهمية ان يكون وقت كتابه بيانات الطالب قبل ميعاد الامتحان بربع ساعه علي الاقل لان الوقت ده بيكون علي حساب الامتحان ويتسبب في توتر الطلاب وهم في عرض دقيقه.

قالت ولية امر الطالبه خديجه وليد بالقسم الادبي طالما تقريبا مفيش شغل نهائي بالمدارس والاعتماد علي السناتر يا ريت يتم تقنين الاسعار والمدرسون اللي بيحضر لهم الاف الطلاب اذا اخد نصف الفلوس اللي بياخدها الان هيكون المكسب كبير ايضا لكن الحصه الواحده في سنتر باكتر من ١٠٠ الي ١٤٠ وهناك مواد تحتاج اكتر من حصه بالاسبوع لتعدد فروعها وهذا عبء كبير اوي علي اولياء الامور.

وقالت حنان عيد ولية امر ...نرجو من الوزارة مراجعة دقيقة للاسئلة و التنبيه على اللجان والمراقبين تهدئة الاجواء ...وعدم اضاعة وقت الطالب ..والتصحيح والتجميع بقواعد واضحة.

اقترح أحمد صابر معلم عربي إن تضع اللجنة المسئولة عن وضع الامتحان تقريرا كاملا للوزير عن المادة التي تم امتحانها وإبراز كل سؤال يحدث عليه لغط ليعرف الجميع ان السؤال تم قياسه على أي أساس ...

قال أعتقد ان هذا يخفف من اللغط الذي يتم بعد تداول أي امتحان وان يكون نموذج إجابة مرفق به كل سؤال كيف تمت صياغته من كتاب الوزارة ... وبكده نحقق مبدأ الشفافية التامة للجنة الامتحان والطالب وولي أمره.

طالبت فاطمة علي والدة الطالب احمد هاني بالقضاء علي الغش خصوصا فالارياف لانه سبب كبير في ضياع حقوق طلاب كتير موضحة ان هذه اللجان معروفة ومبلغ عنها اكدت رباب عبد الهادي ولية امر ضرورة مراعاة نفسية الطالب وعلاقته بالتنبيه على الوقت المتبقى وان المراقب يكون عنده وعى بالضغط العصبي الذي يمر به الطالب ومتى ينبه والصورة الى ينبه بها .

اما نادية كمال والدة طالبة علمي علوم فقالت ارجو تصحيح الاسئلة المقالية يدويا على ايدي المعلمين الافاضل وليس عن طريق الكمبيوتر حيث انه من الممكن ان تكون اجابة الطالب صحيحة ولكن باسلوب اخر غير المغذى به الكمبيوتر.

قالت منى محمد ولية امرعايزين الطالب يبقى من حقه الاحتفاظ بالباركود بتاع ورقة اجابته ( زي ما بتاخد receipt إثبات معاملة).

مع منع الغش في مراكز أسيوط دون تسميتها.

اضافت فعلا هذه الدفعة ضعيفة ولم يأخذوا مخدوش حقهم منذ ان كانوا في التيرم الاول بتالتة اعدادى بسبب كرونا واولى ثانوى وتانية ثانوى ربنا يتولاهم والتابلت والتسريب والتليجرام احنا عايزين امتحانات ترضي ربنا مش تعجيزيه احنا كأولياء امور والله استوينا دروس خصوصيه وحرقه أعصاب.

قالت مروة محمد والده طالبه ادبي ياريت كل ده يبقه في الحسبان حرفيا معظم الدفعه ده اتظلم علشان الكورونا، اضافت ديدي حمدي

والده طالب علمي رياضه ارجوا من المراقبين مراعاة الحاله النفسيه للطلاب وتركهم لآخر الوقت وعدم قول خلصوا عايزين نروح والكلام الكتير جوة اللجنة وعدم تشتيت الطلبه مع غلق التليجرام أثناء الامتحان حتي يتسني لهم اخذ حقوقهم والبحث عن المتسبب عن التسريب، اضافت .. لا للغش لا للغش لعدم ضياع تعبهم وتعب اولياء أمورهم.

وقالت اماني الشريف ولية امر ان تليجرام منصه دوليه ومسموح بتحميله في مصر من خلال تطبيق بلاي ستور وزي ما عليه قنوات الغش عليه قنوات استثمار وشغل وتجار ولو اتقفل في مصر وقت الامتحان يبقى هيقف على مصر كلها مش لجان الثانوية فقط وطبعا اي تاجر او رجل اعمال مش هيسمح بكده وبالتالي صعب التحكم في التليجرام لكن المطلوب وجود أجهزة تشويش شبكات في اللجان

أو بوابات زي بوابات المولات اللي بتشوف كل حاجه فيها معدن في جيب الطالب أو شنطته أو يشوفوا طريقه مناسبة حسب امكانيات الوزاره لأن اكيد الطرق دي مكلفه ومحتاجين تكاتف كل اجهزة الدوله لمنع الغش مش هينفع وزاره التعليم فقط.

قالت مروه عثمان والده طالب علمي رياضه لو اطمأن الطلاب وكان هناك مصداقيه ان الامتحانات جاءت كويسه ونسبة اسئله القدرات مش خارقه وفي المعقول مش حيضطروا للتليجرام ولا الغش مش بنقول الامتحانات تيجي اي كلام بس مش في مستوي دكتور بالجامعه هو اللي يحلها.

طالبت نبيله سلام والدة طالب ادبى نرجو ان يكون الامتحان مناسبا لكل المستويات ونرجو من المراقبين عدم التوتر وتوفير الهدوء في اللجان مع اتاحة نموذج اجابه عند عمل التظلمات.

قالت هبه عمرو والدة طالبه شعبه ادبي اهم حاجه من وجهة نظري المراقبين لانهم قادرون ان يضيعوا تعب الطالب طول السنه لو مش عندهم القدره علي السيطره علي اللجنه خصوصا ان الولاد اصلا اعصابهم بايظه طبيعي واي دوشه او كلام ف اللجنه يتسبب في تشتتهم وانا بنتي من الناس اللي ممكن تنهار فعلا لو في ضغط او شد وجذب في اللجنه فنرجو منهم الهدوء وتوفير جو مناسب للولاد

ثانيا الاسئله كتير جدا وقت الحل دلوقتي بيكون موجود اجابتين صح ف الاختياري فاعتقد المفروض نراعي جدا ان ده ميبقاش مًوجود في الامتحانات.

قالت سلوى جلال معلم رياضيات وولي أمر طالب ثانويه عامه ياريت اخذ النقاط الاتيه في الحسبان ١- توزيع (ورقتين البابل شيت والمقالي+كتيب المفاهيم) الساعه ٩ إلا خمس دقائق لأن فتح المغلف والتوزيع وامضاءات الساده الملاحظين بياخد وقت كبير

٢-مراقبة جروبات الغش وغلقها أول بأول لأن واحد بيتقفل بيتعمل غيره ٣- رئيس اللجنه يختار واحد أمن عند منطقة الحمامات ويكون في تأهب وتفتيش مستمر لأن كل سنه بيتم الإتفاق المسبق مع العمال بدخول شيتات وموبيلات حتى لو العمال اتغيروا وده بيكون بالفلوس

وده بيكون سبب رئيسي لتسريب الإمتحانات مع أسباب تانيه كملاحظ أو طالب او عامل نقل معندوش ضمير

٤-الملاااااحظ يكون نزل ثانويه عامه قبل كده وعارف بيعمل ايه

بعضهم بيكون عنده رهبه ما بيقدرش يسيطر فبيسيب اللجنه تاخد راحتها تصوير وغش ودي مصيبه ،،وبعضهم كثير الكلام والتنبيه على الوقت والرغي بدون سبب ودي ضيعت الامتحانات على طلبه كتير

وبعضهم مش بيعرف يتعامل مع الورق بتاع الطلبه وبياخد وقت كتيير جدا في كتابة اسمه ومراجعة بيانات الطالب

٥- ياريت البار كود ينزل برقم ...أنا كولي أمر ابقى على يقين في حالة التظلم أن دي ورقة ابني ...معذرة السنه اللي فاتت سمعنا عن تبديل الورق والطلبة أكدوا في التظلم أن الورقة مش بتاعتهم.

قالت أمل يحي والدة طالب ياريت يكون من حق الطالب الخروج بورقة الأسئلة بعد الأمتحان للتأكد من إجاباته ومايحصلش زى العام الماضى كتير من الطلبة قالوا إن ده مش ورقهم وان الورق اتبدل

حددت غاده رضا ولي امر طالبه ٣ث علمي علوم لغات مطالبها في :

١-ان يكون وقت كتابه بيانات الطالب قبل ميعاد الامتحان بربع ساعه على الاكثر لان الوقت ده بيكون علي حساب الامتحان وبيسبب توتر للولاد

٢-التنبيه على رؤوساء اللجان بالتنبيه على المراقبين مرعاة عدم اللغو داخل اللجان والتشديد على ده لانه هناك بعض المراقبين بيملوا من طول الوقت وبيبدءوا بالكلام مع بعض وهذا يوتر بعض الطلبه

3-توفير نماذج الاجابة فور الانتهاء من الامتحان لزياده طمئنة ولي الامر والطالب

4-التأكيد على طريقة حل البابل شيت بفيديو وافي مع تحديد كيفية حل مشكله ما اذا تم تظليل اكتر من اختيار وكيفية الغاء التظليل الخطأ

قال خالد الظواهري خبير الأحياء والجيولوجيا اذا أردنا منع الغش علينا اولا اتخاذ قرار حاسم بحذر شبكة المحمول في لجان الثانوية العامة فترة تواجد الطلاب باللجان وثانيا المساواه بين جميع اللجان بمعنى تواجد كاميرات المراقبة بالمدارس الإعدادي التي بها لجان والشي الاخر غلق جميع المكاتب المجاورة للجان لأنها تساهم في تصوير الامتحانات وبعضها يدير شبكة على مواقع التواصل الاجتماعي لحل الاختبارات عن طريق مدرسين معينين أتوا بهم لحل الامتحان كما لابد من مراعاة توزيع الملاحطين في أماكن بعيدة عن مواقع سكنهم وتوفير سبل الراحة لهم من مواصلات وغير ذلك باعتبار ان هناك ملاحظين لايجدون مبالغ للسفر ومطلوب أيضا ان يكون هناك تعاون حقيقي مسؤولي اللجنة والشرطة مع ضرورة أبعاد المواطنين عن مقار اللجان.

اضاف هناك حل آخر بتحرير نماذج للأسئلة وعددها أربعة ويتم توزيعها على كل لجنة على أن تكون الأسئلة متدرجة المستوي ..

قال يوسف ناجى طالب بالصف الثالث الثانوى علمي علوم اريد ان يصل صوتنا للوزير شخصيا لان بجد كده حرام تعب أولياء الأمور بيضيع حرفيا يعني اى الامتحان كل يوم يتسرب ..!!!

فين القائمين على العمل فين الرقابه فين المسؤولين فين كل دول دى امتحانات الشهادة الاعدادية اه شهادة بس لو اللى بيحصل فيها حصل فى امتحانات الثانويه العامه هيبقي اي الوضع الطالب اللى بياخد من درسين وثلاثة فى المادة علشان يقدر يجيب مجموع يدخل الكليه اللى بيحلم بيها ويبقي ليه كيان يعمل اي اللى بيحصل ده بيخلى كل طالب فى الثانويه العامه يتوتر ويخاف اضاف احنا مش حمل صدمة كفايا ضغط الدروس والمذاكرة وتعب أولياء الأمور ..

اضافت عايدة الروبي خبيرة رياضيات واحصاء ثانوي نرجو أن نقضي تماما على ظاهرة الغش خاصة الالكتروني وهذا ليس دور الوزاره وحدها لكن دور كل اللي في لجنة الامتحان سواء أمن او ملاحظين او مراقبين أدوار او الكنترولات الصغيره داخل كل مدرسه بها امتحان ...نتمنى أن لا نجد هذا العام حالات غش الكتروني كالاعوام السابقه .

قالت سلوى جلال ولي أمر طالب ثانويه عامه في رأيي الشخصية لو كان هنا سيرفرات ذات قوه استيعابيه مناسبه لاعداد الطلبه وشبكة نت غير معيوبه 100% كان نظام الامتحان على التابلت الضامن الوحيد لحق الطالب وعدم تفشي الغش بهذه الصوره نهائيا مش عايزة اكرر اللي اتقال.

اكدت وسام الحلو ولي امر طالبة بالثانوية ضرورة ان الاسئلة تكون في مستويات متفاوتة ومراعاة الفروق الفردية بين الطلاب و الباركود ضروري يكون برقم علشان الطالب يضمن ان دي ورقته .

قالت ان من حق الطالب في الاحتفاظ بنموذج الاسئلة الخاص به لضمان حقه والمراقبين والملاحظين يلتزموا بظبط النفس وتهدئة الطلاب ويكونوا فاهمين جدا كيفية توزيع النماذج بطريقة صحيحة منعا لاي خطأ.

طالبت منع الغش في الارياف والمراكز واللجان المعروفة بالغش لانه بيضيع حقوق اولادنا و ضروري جدا يكون في نموذج اجابة موحد بعد الامتحان مباشرة لاطمئنان الطلبة والاسئلة المقالية

تصحح عن طريق المدرسين، قالت ان اسلم طريقة لتعامل الطالب مع تصحيح الخطأ بالبابل شيت، واخيرا ياريت عدم وجود الوان للنماذج لان هذا يربك الطلاب والاكتفاء بوضع رقم للنموذج فقط.

قالت رضوي احمد معلمة لغة عربية وناشطة تعليمية إن ملف الثانوية العامة يعد من أخطر وأصعب التحديات في نهاية كل عام دراسي وبه يتوج العام ويقيم القائمين على العملية التعليمية من خلاله....والمتابع للعملية التعليمية خلال السنوات الأخيرة يدرك كم التحديات التي واجهت هذا الملف...نظرا لأن الثانوية العامة تمثل أمن قومي...

ويجب ان لا ننكر ان الوزارة قد أخذت على عاتقها هذا العام أن تخرج الامتحانات بشكل لائق ومرضي للجميع .

ولكننا نأمل من الوزارة مراعاة بعض النقاط وما زال هناك الوقت الكافي لتنفيذها..

- اعطاء تدريب كاف لكل القائمين على الامتحانات من ملاحظين ومراقبين للتعامل السليم مع الطلاب باللجان حال ظهور أي مشكلة مع الطالب بدء من استلامه أوراق الامتحان وصولا لتسليمه لورقة البابل شيت.

-مراعاة الجانب النفسي للطلاب وتحلي المسئولين بالصبر والثبات الانفعالي أمام الطلاب.

- تطبيق القانون بحزم على الطلاب مثيري الشغب باللجان ومن الممكن التأكيد على ذلك بمؤتمر أخير قبل بدء الامتحانات.

-تطبيق أقصى العقوبة على من تسول له نفسه بتسريب أو تداول الامتحان أيا كان موقعه معلم كان أو طالب.

-يجب على الوزارة نشر نموذج الاجابة بعد انتهاء اللجان بوقت كاف في نفس يوم الامتحان منعا لاثارة البلبلة وتعدد الإجابات بين الطلاب ومعلميهم.

- تأمين اللجان من الخارج وتأمين السادة المعلمين..ومحاولة ان يكون محيط المدارس خال من أولياء الأمور.