عصابة " بطاطس والاتش" امام جنايات الاسماعيلية

تنظر محكمة جنايات الاسماعيلية برئاسة المستشار محمدفتحى الصواف وعضوية المستشارين محمد علي الملط وسامح علي محمود بأمانة سر محمد عبدالهادي .

اقتحموا الصيدلية علي طريقة عبدة موتة وقتلوا صديقهم

اليوم الاربعاء القضية المتهم فيها عشرة اشخاص بقتل صديقهم المدعو "يوسف 20 سنة" ترجع احداث الواقعة لعدة اشهر مضت وعلي طريقة عبدة موتة وابراهيم الابيض دارت احداث تلك القضية التى هزت الاسماعيلية قبل عدة اشهر حيث اقتحم المتهمين صيدلية حاول المجنى علية حماية نفسة منهم الا انهم اقتحموا الصيدلية بالاسلحة وانهالوا علي المجنى علية حتى تأكدوا انه فارق الحياة وقام احدهم بعد علمة بوفاة المجنى علية يوسف باطلاق عيار نارى آخر للاصرار علي وفاتة ، وتبين من التحقيقات التى اجرتها النيابة العامة باشراف المستشار عمرو جميل المحامى العام لنيابات الاسماعيلية

وكما جاء علي لسان والد القتيل ويدعي الشافعى عبدالحميد ٦١ سنة تاجر ملابس مقيم شارع اسكندرية بجوار التأمينات دائرة قسم أول الإسماعيلية - وقال الاب اللي حصل أن انا ابني لسة شاب صغير في السن شقي شوية وأحيانا بيعمل مشاكل مع الناس ومشاكل مع زمايله وأصحابه اللي في نفس عمره و من ضمن الناس اللى هو عامل معاهم خلافات و مشاكل ثلاثة اسمهم بلال وشهرته بلال السو . و صالح وشهرته الاتش و هناك شخص آخر و ده أساس الخلاف ما بينهم أصلا ويدعي أحمد و ده ابني كان عامل معاه مشكلة و اللي اسمه أحمد ده هو اكبر من ابني شوية فاللي اعرفه يعني انه كان بيحاول دايما يفرض نفسه عليه ويعمل كومندا عليه هو وأصحابه لكن معرفش تحديدا ايه الحوارات اللي ما بينهم أو ايه سبب المشاكل بالتحديد

واضاف الاب منذ حوالي ٣ شهور او شهرين ونصف تقريبا مش فاكر بالظبط ابني يوسف الله يرحمه حصلت مشكلة بينه وبين أحمد وساعتها ابني ضربه بمطواة في ايده و بعدها أحمد عمل لأبني محضر و كان بيحاول يساومني علشان يتنازل عن المحضر اللي عمله ضد ابني ده و جالي المحل بتاعي كذا مرة وطلب مني أجيب لة ميكروباص وهو يخلص الموضوع واللي عرفته من ساعتها بقي انه حط يوسف ابني في دماغه و كان عايز ياخد حقه منه

وقال الاب وقبل الواقعة بحوالي عشرة أيام عرفت أن اللي اسمه أحمد راح لأبني في نفس المنطقة اللي هو متعود يقعد فيها دي عند منطقة الغابة وكان لابـس نقاب وطلع خنجر وكان عايز يضربه بس ابني لحق نفسه والموضوع ،اتلم انا بالنسبة لواقعة القتل يوم الواقعة انا كنت في شقتي الجديدة في قسم اول الإسماعيلية و ابني يوسف كان معايا وقالي انه نازل يقعد شوية مع صحابه عند منطقة الغابة و انا مكنتش عايزه يروح هناك لأن المنطقة دي فيها مشاكل كتير بس قالي هقعد شوية وأرجع علطول و راح قعد علي كافيتيريا هناك مع اتنين من أصحابه واسمهم " صعيدي وبطاطس " و اللي عرفته أن التلاتة هجموا مرة واحدة علي يوسف ابني واصحابه و كان معاهم أسلحة

اوضح الاب و بعدين عرفت أن يوسف ابني طلع يجري ناحية شارع طنطا ودخل يحتمي في صيدلية هناك اسمها ترياق و الصيدلي اللي هناك قفل عليهم الباب علشان محدش يدخل بس المدعو صالح ده ضرب طلقتين من السلاح اللي كان معاه ووقع الازاز علي الأرض و الثلاثة راحوا دخلوا الصيدلية علي ابني يوسف ونزلوا فيه ضرب واللي سمعته ان صالح ده ضربه بالسلاح الناري اللي كان معاه في جنبه الشمال في بطنه و ده تسبب ان امعاء ابني تخرج برة جسمه و الاتنين التانيين نزلوا فيه ضرب بالأسلحة البيضا في مختلف مناطق من جسمه و هربوا علطول بعد اللي عملوه ده و الناس اتلمت و طلبوا الإسعاف ونقلوا ابنى على المستشفى العام جثة هامدة