اشرف عبد الباقى يكشف عن ذكرياته مع علاء ولى الدين فى ذكرى رحيله
حرص الفنان أشرف عبد الباقي ، لاحياء ذكرى وفاة الفنان الراحل علاء ولي الدين، وعن ذكريا جمعتهما سويا .
وكتب أشرف عبد الباقي عبر حسابه الشخصى عل الـ فيس بوك، قائلا: ربنا يرحمك يا علاء زي النهاردة من عشرين سنة اتوفى علاء ربنا يرحمه ويغفر له يا رب، وبرغم إن فات عشرين سنة على وفاته، لكنه كان وما زال أقرب صديق ليا.
وأضاف أشرف عبد الباقي: أول مرة أطلع عمرة كان معاه وإحنا رايحين الكعبة قالي بص في الأرض لغاية ما نوصل والكعبة تبقي باينة، وأقولك بص وادعي ويمكن الحكاية دي بقيت أعملها مع أي حد يعمل عمرة لأول مرة وادعي لعلاء، وفي حياته كنت بشوف الخير اللي بيعمله مع ناس كتير واتعلم منه بشكل مباشر وغير مباشر.
واستكمل أشرف عبد الباقي: علاقتنا كانت أكتر من إخوات ومن خلاله كنت بشوف باقي أصحابنا، لأنه كان كريم جدًا ومضياف جدًا وفي بيته كنت بحس إني في بيتي، ووالدته الله يرحمها زي والدتي اللي اتوفت وأنا في سن صغير، وخالد أخوه الله يرحمه ومعتز ربنا يكرمه ويخليه لأولاده زي إخواتي وقت ماكنت أحس إني متضايق أروحله أتكلم معاه وأرتاح، مكانش يعدي يوم إلا لما نتقابل أو نتكلم في التليفون نعرف أخبار بعض.
واختتم أشرف عبد الباقي حديثه: وصادف أن يوم وفاته كان أول يوم عيد الأضحى وبعد ما وقف على الأضحية اتوفي وكنا على ميعاد يومها في المسرح، لعرض مسرحية لما بابا ينام اللي انتهت بوفاته، ربنا يرحمك يا علاء ويصبر أهلك وأصحابك اللي أكيد ما دام عرفوك عمرهم ما هينسوك.
