"والنبي ياما ياما".. الليثي يكشف سر اللازمة التي لا يستغني عنها
أكد المطرب محمود الليثي فى تصريحات له: عايز أقول للجمهور كل سنة وانتوا طيبين وسنة 2023 تبقى أحلى سنة في الدنيا بإذن الله ويعوض عليكم ربنا لو خسرتوا أي حاجة فى ٢٠٢٢، واغنية والنبي ياما ياما" ليها قصة قديمة، وهي إني زمان وأنا صغير في الأفراح كنت عايز أعمل حاجة مختلفة تبقى ليا أنا، فجربتها كده وأنا في فرح حد عزيز عليا وقولتها في المايك فكسرت الفرح بشكل فاق توقعاتي، وقولت خلاص تبقى دي اللازمة بتاعتي.
وأضاف محمود الليثي: الغنوة بتنجح زي الفيلم، وأهم حاجة يبقى فيه قبول عند الناس مش شرط صوتي يكون حلو، وممكن يبقى واحد صوته حلو بس ما عندوش قبول، والقبول ده مكانه القلب واللي ماسك القلب ربنا فأنت لازم تبقى علاقتك بربنا حلوة عشان القبول يمشي معاك.
أما بالنسبة لاغنية يالهوي قال: عملتها من ٥ شهور ومكنتش متخيل نجاحها، واللي بتقول كلمة "يالهوي" في الاغنية ارتيست اسمها روكسانا، ومفيش بابا نويل على التيك توك إلا وبيرقص على الأغنية دي.
اما عن المطربة بوسي فقال هي بالنسبة لي بنتي، وكنت واثق فيها و عارف إن صوتها حلو وكنت بروح لها المحلات أسمع صوتها وكنت بشغل التليفون و أفضل أسمع صوتها وأنا نايم.
واختتم قائلا نفسي فى ٢٠٢٣ ينجح لي أغاني زى "يالهوي"، و"قشطة بالزبادي"، و"بنبوناية"، و"سوق البنات"، و غيرهم، لأن التواجد والنجاح هو ده المكسب، ونفسي السنة دي كمان ربنا يكرم كل الناس ويسعدهم وأشوف مصر قد الدنيا ونفضل فى ستر ونعيم وأمان زي اللى إحنا فيه، ونفسي نعمل مزيكا حلوة تعجب الناس وأغاني حلوة بكلام محترم لأننا بندخل كل البيوت.
